منى سؤال ومنك الاجابة

معندكيش اجابة على سؤالى يا نوسة .. انا حاجاوب على سؤالك مقياس الرقة والدلع للبنوتة هو طبعها واسلوبها وطريقة حياتها

سؤالي : صفة لا تحبيها في الرجل ؟؟

اكتر صفة لا احبها فى الرجل هى البخل
لان اكيد صعب اوى انك تعيشى مع رجل بخيل
سواء باة كان بخيل فى الفلوس او حتى المشاعر
ربنا يحفظ كل البنات ههههههههههه
سؤالى باة هو.......... تعملى اية لو شفتى واحدة صحبتك اوى
بس كان بنكم زعل هى السبب فية وجرحتك اوى تسلمى عليها ولا تطنشيها؟؟؟؟

معاكي حق يا رحاب فعلا اسوأ صفة في الراجل هي البخل والشك .. الاتنين صعبين قوي

اما بالنسبة لسؤالك : فانا بجاوب عليه لاني اتحطيت في الموقف دة فعلا .. وبيني وبينك من جوايا كنت عاوزة اكلم صاحبتي لاني فعلا مش بعرف اخاصم حد لكن للاسف مرضيتش اتكلم معاها او اسلم عليها لانها ضايقتني فعلا وجرحتني من غير سبب عشان كده فضلت اني مكلمهاش الا لو بدأت هي الأول وكلمتني وطبعا هي طنشت فانا كمان طنشت ومكلمتهاش

سؤالي بقى : مين هو اكتر واحد بتحبيه من بعد ربنا سبحانه وتعالى ؟؟

اهلي

ايه اكتر صفة بتحبيها في نفسك ؟

التسامح
طموحك العمل ولا البيت وتربية الاولاد

البيت وتربية الاولاد لان ده اللي حاصل معايا دلوقتي لاني دكتورة اسنان وبقالي ستة سنوات اجازة علشان اولادي وكل هدفي واولي اولوياتي وامنيتي في الحياة ان اولادي يبقوا متفوقين اوي في دراستهم ونفسي يبقوا من الاوائل علي الجمهورية وشايفة ان ده اهم من شغلي سؤال للي بعدي مين اكتر واحد بترتاحي لما بتفضفضي معاه و بترمي هموم من عليكي لما بتحكي معاه

بصراحه اللى بحب اتكلم وياهم اختى ومامتى لان الاصحاب مينفعش اى صديقه تتوتمن وربنا يعافينا جميعا وسوالى للى بعدى ايه اكتر مره زعلت فيها ؟

اكتر مرة زعلت فيها لما بحس اني لوحدي ومفيش حد مهتم بيا ولا حد حاسس بيا .... سؤالي للي بعدي : مين هو مثلك الاعلي ؟؟

مثلى الاعلى فى حياتى كان والدى اللة يرحمة
ويرحم كل اموات المسلمين رحمة واسعة
سؤالى للى بعدى
فى رايك كم عدد الولاد المثالى فى الاسرة ولية؟

الله يرحمه ويرحم اموات المسلمين اجمعين
2 اتنين
عشان يتربوا تربية سليمة وصحيحة بحب ورعاية واهتمام في ظل ظروف صعبة في المعيشة والصحة والتعليم
سؤالي : ايهما افضل الحب قبل الزواج ام بعده ؟؟

الحب قبل الزواج حاجه وبعد الزواج حاجه تانيه
انا رائيى الاتنين احلى من بعض
سؤالى
ايه رائيك فى الواحده اللى بتحب واحد زميلها او غيره ؟ وايه رائيك لو بعد الحب ده كان فى خطوبه وزواج ؟
هل كده غلط ولا لا

مش عيب اننا نحب ونتحب المهم نتيجة الحب ده ايه .. ومدام النتيجة خطوبة وزواج يبقى حب سليم ميه في الميه .. اما الغلط اذا كان الاختيار خاطيء والحب كان للتسلية ..
سؤالي : ما معنى الحب بالنسبة ليكي ؟؟

أيوة معاكى يا أيمى ان مش عيب نحب ونتحب

بس ازاى



أنا شايفة ان الحب شىء يقر فى القلب تيجى تتخلصى منه ما تقدريش ويدفعك لكل شىء جميل

ولكن مش معنى كده ان الحب لو حسيته فى يوم أسىء استخدامه

بمعنى انه يفضل فى القلب وما تنساقش وراه البنت

يعنى تقابل شاب أو تكلمه فى التليفون أو تراسله زى ما بنشوف وتفتكر انها كده وفيه

لا أبدا والله دى مش وفيه وأول اللى غدرت بيهم نفسها وأهلها

أنا مش بقول الكلام ده من فراغ أنا شفت أمثلة كتييييييييييييييرة جدا

وأعتقد ان كل واحده فيكم شافت برده أو سمعت عن كتييييييييير

وأنا شايفة ان البنت فى كتير من الأحيان لو وقفت مع نفسها هتشوف الشاب اللى هى متعلقة بيه ماينفعهاش بكل الصور وانه فعلا مش كويس

بس دايما يضحكوا على نفسهم ويقولوا هذا غير الدنيا كلها .....دا ملاااااك من السما

أنا رأيى ان الحب بعد الزواج حاجة تانيه خالص

فعلا حب حقيقى وله هدف بس المهم البنت تختار صح من الأول

على أساس الدين والخلق زى ما نصحنا الرسول عليه الصلاة والسلام

على فكرة أنا متزوجة ورزقنى الله بحب زوجى حبا شديدا

ومش معنى كده ان احنا مش بنختلف

بالعكس بنختلف كتير جدا بس فى الآخر بنتقابل عند نقطة تقرب وجهة نظرنا أو اعتذار يطيب خاطرنا أو نظرة وضحكة جميلة تصفى قلوبنا

هى دى الحقيقة اللى لازم تحسها ومش هقول تفهمها كل بنت علشان ترسم طريقها صح

أنا طولت قوى عندى كلام كتييير بس هسيب الباقى ليكم

بس أنا نفسى تكون مواضيعنا هادفة مش بس للتسلية

لقوله تعالى "وما يلفظ من قول الا لديه رقيب عتيد" .........آآآآآآه صحيح دا أنا ما جاوبتش على السؤال

الحب بالنسبة ليا هو شعور الانسان بالراحة الطمأنينة الى جوار من يحب والشوق اليه بلا حدود

وأشهد الله واشهدوا أن أكثر من أشعر بالراحة والطمأنينه الى جواره هو القرآن الكريم

ثم أمى وزوجى وأولادى

كل دول طبعا بعد الله ورسوله

وسؤالى لمن بعدى

لو عرفت ان أخوكى على علاقة ببنت زميلته وهو فعلا بيحبها وصادق فى مشاعره وبيقول انه عاوز يخطبها

وفى نفس الوقت مستقبله غير واضح المعالم ووالده مش قادر يساعده وقدامه 10 أو 15 سنه على ما يقدر يفتح بيت

هتنصحيه بايه؟؟؟

خدى بالك سؤالى واقعى وعاوزة اجابة واقعية

ما شاء الله عليكي يا زهرة .. صحيح زهرة الفل اسم على مسمى .. بصي يا ستي .. سؤالك ده عدي عليا كتير قوي وتجارب حقيقية فعلا الحب في الحالة دي حب غير ناضج ومش سليم لان المفروض الانسان يبني مستقبلة الاول او على الاقل يحدد اهدافة وبعدين يحب ويربط انسانة جنبة .. لان الحب وحدة لا يكفي .. احنا في مجتمع صعب وبنعيش ظروف صعبة احيانا الولد والبنت بيفتكروا نهم ممكن يتحدوا اي ظروف واى صعوبات بالحب ويبداو يقولو لقمة صغنونة تكفينا عش العصفورة يقضينا .. بس للاسف مش لاقيين حتى اللقمة الصغنونة ولا العش الصغير اللى حيجمعهم .. الانسان لازم يحكم عقلة في كل حاجة ويحكم على الامور بعين العقل بعيدا عن المشاعر والحب لان الحب نقطة ضعف العقل ممكن يقول انا بحبها وعاوز اخطبها وهي تقول انا بحبة ومستعدة استناه بس صدقيني ده مستحيل مش صعب مستحيييييييييل .. لان الولد ياما حيقابل والبنت ياما حتقابل .. هما بيقولو كده دلوقت عشان لسا شايفين الدنيا حلوة ورومانسية في عينيهم لكن هو لما يصطدم بالواقع ويلاقي نفسة عليه التزامات كتير لازم يوفرها عشان يكلل الحب ده بالجواز بس طبعا ده محتاج لوقت .. والوقت ده حيكون بيمر من عمر البنت ومفيش واحده عندها استعداد تقعد تستنى عشر سنين ولا حتى سنتين .. حتى لو هي مستعدة اهلها حيرفضوا مفيش ام واب عاوزين بنتهم تفضل قاعدة جنبهم وبالتالي بيرحبوا باول عريس جاهز يتقدم .. لان سن البنت بيكبر غير الولد لو عنده خمسين سنه حيتجوز وبرضو ساعتها حيدور على واحده تكون 20 او 25 سنه بالكتير .. لكن البنت فرصتها اقل .. لو اخوكي بيحبها يسيبها تشوف مصلحتها وحرام يربطها جنبه على الفاضي واصلا اهلها مش حيستنوا عليه ولا عليها .. حتتجوز وتعيش حياتها وهو مسيرة في الوقت المناسب اللى يكون واقف فيه على رجليه صح يلاقي البنت المناسبة اللى يحبها وتحبه برضو .. والدنيا مش بتقف عند حد ... معليش انا طولت في الكلام لكن والله الموضوع ده يستاهل كلام اكتر من كده .. اسأل مجرب بقى ... اما بقي سؤالى :
هل تعترفي بالحب من اول نظرة ؟؟

برافو عليكى يا ايمى

أما اجابة السؤال أسيبها للى بعدى لأن أنا أخدت دورى

لا لا اعتقد بالحب من اول نظرة
لانة بيكون اعجاب مش حب
وممكن مع الوقت الاعجاب دة يختفى او يزيد
وانا بصراحة لا اؤمن بالحب الا بعد الزواج
لانة بيكون حب حقيقى وحلال وبيزداد اكتر فى رضا اللة عزوجل
وتنتج عنة المودة والرحمة و السكن
وسؤالى للى بعدى ..............
اية اكتر موقف محرج اتعرضتى لية فى حياتك.....؟

هههههههههه الاول ازيك يارحاب عامله ايه
انا اكتر موقف محرج اتحطيت فيه كنا فى فندق سبع نجوووووووم فى اسوان وكنت انا فى شهر العسل رجعنا بليل مهدودين خالص من كتر الفسح والمشى وصلنا الفندق وركبنا الاسانسير ووصلنا الدور بتاعنا اول ماطلعت من الاسانسير قعدت اجرى على السيراميك واتزحلق وفجأه وانا بعمل كده طلعوا فى وشى مجموعة سياح رحت اتزحلقت واتكبيت فى الارض زى البطيخه والاجانب فضلوا يضحكوا عليا وانا اتكسفت وبقيت محرجه جدا
السؤال للى بعدى مين اكتر حد بتكرهيه فى حياتك ولما تشوفيه تبقى عايزه تخنقيه ؟؟؟؟؟؟؟؟؟

انتوا فعلا كلكلم زى السكر
والموضوع جميل اوى يا رحاب
الاجابه :اللى فعلا بشوفه وبيبقى نفسى اخنقه هى شخصيه معايا فى الشغل ياساتر يارب اجاركم الله على الغلاسه والظرف ربنا يحفظكم
السؤال: ازاى بتحافظى على الناس اللى بتحبيهم,وازاى تظهرى حبك واحترامك ليهم؟

يا جماعة هو بودرة اوريفليم المضغوطة بكام للاعضاء

في بودرة oriflame beauty control pressed ب57 وللأعضاء ب44
دي صفحة 65
وفي بودرةoriflame beauty silk touch pressed ب104 وللعضو ب80
دي صفحة 68
وفي فنفس الصفحة بودرة جورداني مضغوطة ب179 وللعضو138

وقفتوا اللعبة لية يا بنات
دي حلوة قويـــــــــــــــــــــــــــــــــــــــــــــــــــي
انا نفسي العب معاكم اي لعبة يالا حد يشجعني

اللعبه كانت حلوه اوى كان نفسى العب معاكوا بس يالا تتعوض مره تانيه

احنا فيها يالا نلعب
انا شغلت اللعبة تاني واي حد في اي وقت يدخل يلعب ونكملها دي حلوة قوي
وانا نفسي العب جدا بصراحة
الواحد محتاج يخرج من الملل اللي هو فية

طيب انا هقول سؤال
اية اكتر حاجة مجنونة ممكن تكوني عملتيها في حياتك؟

روحت فى الشهر العسل المصيف مع اهلى

ايه اكتر شى نفسك فيه وبتتمنى انه يتحقق

ههههههههههههههههههههههههه
واضح انك مرتبطة بأهلك قوي

الاجابة:
بصي اول ما قرأت السؤال جت علي بالي حاجة نفسي تتحقق ونفس الوقت معرفش هي خير ولا لأ فبدعي ربنا ان كانت خير ييسرهالي
وعندي دايما حاجتين نفسي فيهم قوي إجازة القرآن والحج

اية اكتر مكان نفسك تروحية ولسة مرحتيهوش؟