إية رأيكم ؟؟؟؟

السلام عليكم و رحمة الله و بركاته

إزيكم كلكم يااااااااارب تكونوا بخير معلش مش بدخل كتير عشان لسة تعبانة شوية و بخاف أدوخ من فتح النت فترة طويلة
أنا بفكر أعمل أوردر الشهر دا أنا بس بما إني متنفضة خايفة أشتري حاجات ملهاش لازمة و أكيد قولت أخد رايكم

أنا عيني مرهقة جداً من التعب الفترة اللي فاتت و عندي هالات سودا و كنت بفكر أشتري سينج إز بليفنج أو كريم الاكسجين فياريت اللي جربهم يقولي إيه الأخبار لإني فاكرة أن في حد قال أن سينج إز بليفنج عمل إلتهابات لصاحبتها و في الموقع الأجنبي كلام اللي جربوه متناقض جداً أما كريم العين بتاع الأكسجين فمعرفش كتير استخدموه و على الموقع 7 بس اللي كاتبين تجربتهم و كلامهم مريحنيش

كمان كنت عايزة أشتري ملمع الشفاة الشفاف اللي لما بيتحط على الشفايف بيتغير لونه لوردي هو كوده 22479 في صفحة 61 أنا فاكرة ان سارة شكرت فيه فياريت لو حد تاني جربه يقولي إيه أخباره و هل بيكون اللون طبيعي بس وردي و الا بيبان فاقع زي الروج

طبعاً إنتوا عارفين أختي المملة ووشها اللي معذبني و كنت بفكر أشتريلها ماسك الرؤوس السودا فلو حد جربة ياريت يعطيني رأيه

أخر حاجة صابونة المساج في ناس كتير شكروا هنا فيها أنا كنت عايزة أعرف هي بتقشر فعلاً و تنعم و تنور الجلد يعني مثلاً أكنك عملتي بصابون مغربي و الا هي بديلة للصنفرة بس

مرة تانية سلامي للجميع و لو إتأخرت عليكم في الرد أعذروني غالباً لإني مش هقدر أفضل كتير على الجهاز بس هخلي أختي تشوف الردود و تقولي على أرائكم لغاية مقدر أرد

اولا الف سلامه عليكى يا قمر بالنسبه اللى عارفوه لكل ده عينك وهالات دى احسن شئ انك تنامى وابعدى عن الشاى والقهوه الفتره دى وكمان جريبى الخيار حلو اووى للعين ثانيا الملمع البينك ده عندى منه بس من شركه افون شبه اووى ف الاول بيبقى شفاف ويقلب لوحده بينك كده وخلى اختك تستعمل صابون طبى وتبعد عن الصابون العادى ده وكمان غسول بيور ناتشرز ده اللى بالشاى والروز مارى حلو اوى خليها تجربه والصابونه المسج انا جبتها الشهر ده وشويه وهادخل اخد شاور بيها واقولك ع النتيجه يا قمر بس انا موش عارفه هاستعملها ازاى يقى هى شكلها غريب اصلا ويارب حد يقيدك بالنسبه لكريم العين

حمد لله على لاسلامة يا بيور والف سلامة عليكي وعلى عينيكي
بصي يا ستي انا جربت كريم الأكسجين وجربت سينج از بيليفنج التاني حسيته بيرطب وخلاص اما الأكسجين انا لسه بدأه استعملة من يومين بس وحقولك على النتايج بس انا الحمد لله مش عندي خطوط والهالات عندي متوسطة بس الحمد لله محصلش اي التهابات
ملمع الشفاه زي ما تقي قالت بالضبط هو شفاف بيدي لمعه ولون فوشيا بس اللمعه مبتدومش اللي بتدوم اللون
انا مجربتش ماسك الرؤس السوداء بس جربت ماسك بيور سكين الأكياس ومحسيتش بيه واو قوي لكن اللي ريحني ماسك ناتشور بالبردوك
صابونه المساج انا جربتها ومحسيتش باي مساج كان في موضوع ماريان عاملاة عشان تشتكي من ريحتها انا بقولك انا ريحتها مش واو بس الحمدلله مش بتفضل بعد الشاور جربي صابونه الميلك اند هاني دي عجبتني جدا واحلي صابونه في الحاجات اللي جربتهم -انا جربت اليمون والمانجو بس استريحت جدا على الميلك اند هاني
اتمني اني اكون افدتك
ومتغيبيش عننا تاني كتير كده

الف سلامه ياحبيبتي
بصي كريم العين والله مش لازمه اي حاجه هو برطب شويه وخلاص لكن هالات وكلام من ده انسي
والملمع الوردي ادماااااااااان
انتي عارفه اني جايبه الشهر ده 15 واحد تخيلي ليا ولاصحابي واتخطفوا
بيطلبوه علي طول من زمان وهو مش بينزل كتير
انتي تقدري تتحكمي في قوة لونه
حطي نقطه صغننه خالص بيدي لون وردي
حطي كتير بيدي فوشيا

بيور انا انا استعملت الصابونه النهارده الصبح وياريتنى ماستعملتها هى متعملش حاجه ولا حسيت بفرق بس عجبينى ريحتها موش عارفه ليه دينا بتشكى من ريحتها المهم دلكت بيها جسمى ولا عملت حاجه قلت هاجربها ع وشى وبعد شويه لاقيته بيقشر قولت يلهوتى وانا المفروض رايحه الكليه لاحقت نفسى بكريم مرطب حطيته بس بتتقشر الوش وريحتها بتروح بس جايه ع ريحه كامى شويه بس حسيت انها هتجيب نتيجه مع الاستمرار بس كله واما وشى قشر كل امسحه يقشر اكتر وكنت رايحه الكليه كمااان

ههههههههههههههههه ضحكتيني يا sandrala و أنا مش قادرة أضحك يا نهار أبيض عملتي بيها وشك حراااام عليكي دا إنتي كمان صغيرة طيب أنا كبيرة و اللي حصل حصل و بشرتي إتبهدلت و بجرب لكن إنتي بتجربي صابونة مساج للجسم على وشك هههههههههههههههه بجد إنتي جبااااااااااارة أحب أنا البنات الجريئة و بتجرب كدة 100% بس متعمليش كدة تاني يا قمر ههههههههه
طبعاً الله يسلمك وشكراً جداً على التجربة المفيدة ههههه و على النصايح الغالية أنا فعلاً بشرب مياة و بنام يمكن مش كويس أوي بس إلى حد ما كويس بس أنا الفترة دي أخدت كذا دور تعب و الأنيميا زايدة و عشان كدة باين التعب و الإجهاد و الهالات على وشي و عشان كدة قولت مؤقتاً عقبال مروح للدكتور و نظبط الأنيميا لأن دا هياخد وقت طويل فكرت في كريم للعين لو كويس أما بالنسبة لأختي فهي بتستخدم غسول بيور سكين و حلو معاها و كنت سألت الشهر اللي فات عن مجموعة الرؤوس السودا و د وردة ربنا يكرمها قالت إنها حلوة و كنت هشتريهالها لولا إني تعبت و كمان وشها هدي و الروؤس قلت فمعملتش أوردر و الشهر دا غالباً هعمل و الماسك بسعر كويس و عشان كدة قولت أسألكم الأول لإني بثق فيكم جداً جداً جداً... شكراً يا قمر على ردودك و أوعي تستخدمي أي صابونة أو كريم أو أي منتج للجسم على وشك تاني لأن جلد الوش حساس أكتر من الجسم و زي مبنقول دايما تقدري تستخدمي من الخاص للعام لكن مش العام للخاص يعني ممكن تستخدمي كريم مرطب للعين للوجه لكن مينفعش العكس و بالمثل ممكن تستخدمي كريم وجه للجسم لكن مينفعش العكس

dinaali الله يسلمك يا قمر عاملة إيه يارب تكوني بكل خير ....شكراً يا جميل على الرد ربنا يخليكي و يبارك فيكي بس ليه سؤال هو ماسك ناتشورال اللي بالبردوك دا اللي لونه روز و الا أنتي قصدك أنه ؟


سـاندي حبيبة قلبي و الله لسة كنت فاكراكي قبل مفتح و بدعيلك عاملة إيه و العملية إتحدد ميعادها و الا لسة ربنا يااااارب برحمته و قدرته يتم شفائك على خير و يعجل به و نطمن عليكي ... حلو موضوع الإدمان دا طمنتوني كدة شكلي هضطر اشتري ليه و لأختي كمان و أنا اللي هدبس في الفلوس ههههههه أما كريم العين فأنا كنت عايزاه للهالات مش للترطيب و لو مش هيعمل حاجة هضطر أقضيها كونسيلر مع إني مش بحب أحطه كتير .... خللي بالك من نفسك يا ساندي و طمنينا دايماً عنك و بإذن الله هتكوني زي الفل و هنعملك أحلى حفلة بالمنتدى إن شاء الله

ههههههههههههههههه انا قولت اجرب مع انى موش بحب اى حاجه تكون ف وشى انا الحمد لله بشرتى صافيه والمشكله حساسه واما بتطلعى حبه موش بسكت بفضل العب فيها وتبقى مضيقنى واحس الناس كلها بتبص عليها وبس ساعات بجرب كده والحمد لله بتعدى بس اللى مضايقنى دوقتى ف وشى عندى سمرار خفيف كده حولين بوقى كله من موش عارفه ايه ده بجد واما قولت لدكتوره الجلديه اللى بتعلج عندها عشان شعرى ع انو فى كام حبه كده بتيجى ف وشى بس بتروح وزى مخلهش تيجى تانى تقولى لا متستعمليش اى حاجه لوشك انتى بشرتك جميله ومتتدتيش اى علاج بس دوقتى مفيش ولا حبه الحمد لله بس مشكله السمار دى اللى حولين بوقى كله تبقى بشرتى بيضا والحته دى غامقه عنها بتضيقنى اوى وموش عارفه اعمل ايه والله

sandrala كتب:

ههههههههههههههههه انا قولت اجرب مع انى موش بحب اى حاجه تكون ف وشى انا الحمد لله بشرتى صافيه والمشكله حساسه واما بتطلعى حبه موش بسكت بفضل العب فيها وتبقى مضيقنى واحس الناس كلها بتبص عليها وبس ساعات بجرب كده والحمد لله بتعدى بس اللى مضايقنى دوقتى ف وشى عندى سمرار خفيف كده حولين بوقى كله من موش عارفه ايه ده بجد واما قولت لدكتوره الجلديه اللى بتعلج عندها عشان شعرى ع انو فى كام حبه كده بتيجى ف وشى بس بتروح وزى مخلهش تيجى تانى تقولى لا متستعمليش اى حاجه لوشك انتى بشرتك جميله ومتتدتيش اى علاج بس دوقتى مفيش ولا حبه الحمد لله بس مشكله السمار دى اللى حولين بوقى كله تبقى بشرتى بيضا والحته دى غامقه عنها بتضيقنى اوى وموش عارفه اعمل ايه والله

بصي يا قمر طالما إن بشرتك الحمد لله مفيهاش مشاكل كبيرة حاولي تبعدي بقدر المستطاع عن الكريمات و عوضيها بماسكات طبيعية عشان متضرش بشرتك و إنتي لسة صغيرة ... كمان إتأكدي إن الغسول مناسب لسنك يعني أنا أختي عندها 16.5 و مخليتهاش تستخدم بيور سكين إلا لما إتأكدت إنه لفوق 16 ..
و بالنسبة للحبوب طالما إنها قليلة و بتروح لوحدها إطمني بس حاولي متلعبيش فيها عشان متلتهبش و عشان متنقليهاش من مكان للتاني
أما بالنسبة لحول شفايفك لو بشرتك دهنية إعملي ماسك خيار على وشك بينور الوش و بيفتح الأماكن السمرا و هتشوفي الفرق من أول مرة و لو بشرتك جافة ممكن تحطي عليه لبن بس خللي بالك إن في ناس لما بيخلطوا اللبن و الخيار أو الزبادي و الخيار على وشهم ممكن يعملهم حساسية و أنا منهم عشان كدة بستخدم كل واحد لوحدة فلو حسيتي إنه بيحرقك شوية أغسليه على طول و متقلقيش وشك هيهدى بعدها و لو معندكيش حساسية هيكون مفيد جداً و لو أفتكرت حاجة تانية ممكن تفيدك هكتبهالك (أصل أنا بحب الماسكات الطبيعية جداااااً و بجربها كتيــــــــر )

ربنا يخليكى يا بيور يا حبيتى بس الحبوب معنديش مشكله معاها الحمد لله هى حبيه اتنين كده وصغيره بتروح بس المشكله موش بحب اى حاجه تبقى فى وشى كده بس ايه ماسك الخيار ده وصح انتى اسمك ايه الحقيقى؟؟

sandrala كتب:

ربنا يخليكى يا بيور يا حبيتى بس الحبوب معنديش مشكله معاها الحمد لله هى حبيه اتنين كده وصغيره بتروح بس المشكله موش بحب اى حاجه تبقى فى وشى كده بس ايه ماسك الخيار ده وصح انتى اسمك ايه الحقيقى؟؟

ماسك الخيار عبارة عن خيارة بتعصريها و تصفيها لو كان العصير خشن و لو كان ناعم بتحطيه على وشك لغاية أما ينشف و بتغسليه بماء بارد و دا أنا استخدمته و كان حلو و أختي إستخدمته فترة و كان تحفة عايزة أقولك إن وشها كان مسمر جداً جداً من شمس المصيف و مش عايز يقشر و ملطش و إستخدمته تقريباً 3 أو 4 أيام و رجع وشها زي الأول بس هي بشرتها دهنية زي مقولتلك
أما بالنسبة لإسمي فلو كان في خاص والله كنت قولته بس للأسف أنا إستغبيت و إستخدمت نفس الأسم في كذا موقع حتى إن في ناس سألوني في موضوع على موقع تاني هل أنا نفس الشخص و طبعاً عشان أنا غبية جاوبت بالإيجاب مع إني لغاية دلؤتي معرفتش مين اللي سألت فسامحيني في أسمي الحقيقي لإني لو كتبته هيتعرف على كذا منتدى و أنا مش عايزة كدة خاصة إني كتبت قبل كدة أنا من فين بالظبط في القاهرة و بشتغل إية و مش فاضل غير إسمي لكن أوعدك لو ربنا سهل و مدام رشا سمحت في أي وقت بالرسايل هبعتلكم إسمي لإني بجد بعتبر ناس كتير أوي هنا أخواتي وربنا أعلم بمعزتهم عندي و نفسي أتعرف بيهم و دا هيكون شرف كبير ليه

تقي انتي جباااااااااااااااااااااااااااااااااااارة بجد
على وشك!!!!!!!!!!!!!!!!!!!
انا وقعت من الصدمه
لا وقشرتي ؟؟؟؟؟؟؟؟؟؟؟؟؟زي البرتقالة ؟؟؟؟؟؟؟؟؟؟؟؟؟؟؟ ولا الكيوي يا نهار كل مافتكر!!!!!!!!!!!!!!!!!!
بيور ايوة صح اللي بالبردوك هو الروز وشكرا على سؤالك وعلى كلامك الرقيق
شيمااااااااااااااااااااااااااااااااااااااااااااء عاملة ايه يا جميل واخبارك ايه دلوقتي وعمليتك اتحددت ولا لسه اصبري يا حبيبتي ان الله مع الصابرين وربنا يعفي عنك ويشفيكي

بيور انا اللي كنت بسالك علي فتكات هههههههههه
نفسي اعرف اسمك الحقيقي
حاسه انه ساره

شكرا يا بيور ع ردك والمعلومه الخيار دى وهحاول اجربها انشاء الله وع حكايه الاسم مفيش مشاكل خلاص يا قمر ولا يهمك بس انا موش فاهمه حصلك مشكله ف المنتدى بس لغبطه الاسمائى ولا ايه ولا اما يتكتب الاسم الحقيقى بيبقى ف مشكله بتحصل

Pure Snow كتب:

sandrala كتب:

ربنا يخليكى يا بيور يا حبيتى بس الحبوب معنديش مشكله معاها الحمد لله هى حبيه اتنين كده وصغيره بتروح بس المشكله موش بحب اى حاجه تبقى فى وشى كده بس ايه ماسك الخيار ده وصح انتى اسمك ايه الحقيقى؟؟

ماسك الخيار عبارة عن خيارة بتعصريها و تصفيها لو كان العصير خشن و لو كان ناعم بتحطيه على وشك لغاية أما ينشف و بتغسليه بماء بارد و دا أنا استخدمته و كان حلو و أختي إستخدمته فترة و كان تحفة عايزة أقولك إن وشها كان مسمر جداً جداً من شمس المصيف و مش عايز يقشر و ملطش و إستخدمته تقريباً 3 أو 4 أيام و رجع وشها زي الأول بس هي بشرتها دهنية زي مقولتلك
أما بالنسبة لإسمي فلو كان في خاص والله كنت قولته بس للأسف أنا إستغبيت و إستخدمت نفس الأسم في كذا موقع حتى إن في ناس سألوني في موضوع على موقع تاني هل أنا نفس الشخص و طبعاً عشان أنا غبية جاوبت بالإيجاب مع إني لغاية دلؤتي معرفتش مين اللي سألت فسامحيني في أسمي الحقيقي لإني لو كتبته هيتعرف على كذا منتدى و أنا مش عايزة كدة خاصة إني كتبت قبل كدة أنا من فين بالظبط في القاهرة و بشتغل إية و مش فاضل غير إسمي لكن أوعدك لو ربنا سهل و مدام رشا سمحت في أي وقت بالرسايل هبعتلكم إسمي لإني بجد بعتبر ناس كتير أوي هنا أخواتي وربنا أعلم بمعزتهم عندي و نفسي أتعرف بيهم و دا هيكون شرف كبير ليه

احنا بنسال على شان كان في موضوع نيرة اللي هي روز المنصورة بتسال فيه عن اسامينا وفي ناس كتير دخلت وذكرت اساميها وكان في فضول جامد على الناس اللي كاتبة اوصاف لأسمها زيك و ساد انجل ا
الناس المحترمة اللي عرفناهم وحببونا في المنتدي
وفي ناس تانية محتارين فيهم هما رجال ولا بنانيت زي ميدو مثلا
بس هو ده الموضوع وطبعا الموضوع حرية شخصية في الآخر

ساندي كتب:

بيور انا اللي كنت بسالك علي فتكات هههههههههه
نفسي اعرف اسمك الحقيقي
حاسه انه ساره

لسه يادينا والله الهمجلوبين عمال ينزل ينزل مع اني باخد حقن هرمونات غاليه جدا ب 2750 باخد 2 فالاسبوع
ومش بيترفع بالعكس بينزل وبقي 6
وهوالمفروض يبقي 13
وكذا دكتور هيتجنن مش عارفين السبب وبعت تحاليلي بره مصر
وعاوزين ياخدوا عينه من النخاع والبتاعة دي صعبه اوي
عملتها مره قبل كده كنت هموت منها مش عاوزه اعملها تاني مع اني شفت اصعب من كده بس مش عارفه ليه خايفه اوي
جايز خايفه من النتيجه مش من التحليل نفسه
ادعولي اوعوا تنسوا

ربنا معاكي يا حبيبتي ويعينك على ما بيكي فعلا موضوع النخاع ده ربنا يقدر اللي بيعملة لأنه صعب
اكيد في حل يا شيماء ان شاء الله ربنا يكرمك ويجازيكي خير وان شاء الله تعملي العملية في ميعادها اللي كاتبهولك ربنا واحنا كلنا هنا معاكي
طيب انتي معتنية باكلك كويس وادويتك مظبوطة مفيش حاجة منها تكون عاملالك وقف امتصاص لحقن الهرمونات
انا كنت قريت مرة ان في حاجات معينه لما بتتاخد مع بعض بتوقف امتصاص الجسم وبتضيع فايدتها

كده يا دينا ماشى ماشى بتضحكى عليا ليكى يووووووووم ولله لحقت نفسى بكريم ع طول وكنت نازله الكليه الصبح هروح مقشره البنات هتقولى كنتى بتصيفى ولا ايه انا قولت اجرب يمكن تعمل حاجه بدل موش حاسه ان ليها اى فايده والصابون العادى احسن وبينطف اكتر كمان

معلش يا شيماء انشاء الله تقومى بالسلامه يا حبيتى وترجعى احسن من الاول وانا هادعيلك ف صلاتى انك تخفى وانشاء الله ميطلعش فى حاجه متقلقيش خير انشاء الله بس انتى اصبرى شويه وادعى ربنا انو يشفيكى

ايوه يادينا عندك حق الدكتور قالي اوقف كل الادويه اللي باخدها
عشان نشوف الموضوع ده
دينا طلعت دكتوره ياولاد ههههههههههه
بس هو قالي وقفيها اسبوعين ولو لسه هنعمل النخاع
انا عدي عليا اسبوع واحد ومنتظره وبدعي ربنا بس خايفه مع اني مش عادتي
يعني انا بقالي 9 سنين في مواويل زي دي بس بجد مهدوده جدا مش بقوم ولا بمشي الا لو حد ساندني
وسبت الشغل بقالي شهرين
اللهم لا اعتراض

هههههههههههههههه
فعلا صابونه الميلك اند هاني جمييييييييييييييييييييييييييييييييييييلة تحفة كانك بتستحمي بكيلو كريم مرطب تجففففففففففففففففففففففففففففففففففففففففه

ساندي كتب:

ايوه يادينا عندك حق الدكتور قالي اوقف كل الادويه اللي باخدها
عشان نشوف الموضوع ده
دينا طلعت دكتوره ياولاد ههههههههههه
بس هو قالي وقفيها اسبوعين ولو لسه هنعمل النخاع
انا عدي عليا اسبوع واحد ومنتظره وبدعي ربنا بس خايفه مع اني مش عادتي
يعني انا بقالي 9 سنين في مواويل زي دي بس بجد مهدوده جدا مش بقوم ولا بمشي الا لو حد ساندني
وسبت الشغل بقالي شهرين
اللهم لا اعتراض

يا بنتي انا بقالي سنييييييييييييييييييييين موراييش حاجه غير سافاري وer وجرايز اناتومي وهاوس وكل ما له علاقة بالطب ده غير الجواز بيعلم كتير عن الطب بقال سنتين حمل واجهاض وبهدلة على ما جبت انس
شعورك طبيعي جدا لأننا ساعات بنتعب -مش يأس لاسمح الله - بس ساعات بنتعب من طول المشوار او ان خلاص الحمد لله ربنا كرمنا ولقينا حل حتي ولو كان نص العما زي مابيقولوا بس اهو انقاذ
معلش هانت

زيي بالظبط اي ار واناتومي وهااااااوس
دانا مهووسه بجد بيهم
ربنا يخليلك انس يارب اكيد غاااااالي اوي جاي بعد تعب زي حالاتي هههههههه
انتي عسل اوي يادينا بحس انك اختي الكبيره ودايما فكراني وبتسالي عني انتي وبيور بجد بحس انكم اخواتي الكبار
والله العظيم مش كلام

دينا حلو موضوع البرتقال دا ههههههه ...الماسك دا فعلاً ناس كتير شكروا فيه بس أنا مجربتوش ربنا يسهل لو نازل بسعر حلو هشتريه إن شاء الله .. موضوع روز أنا فعلاً شوفته أول متعمل بس متبعيتوش لإنه كان في بداية تعبي و غيبت الفترة اللي فاتت و معرفتش أخباره إيه و ساعتها كنت لسه مسجلة في فتكات و موقعين تانيين .. في فتكات سجلت لأنه كان في موضوع كان لازم اشكر صحبته عليه و الموقعين لإني كنت عايزة أستفسرعلى حاجات و خوفت ساعتها أكتب أسمي بما إني سجلت في كذا موقع

ساندي حراااام عليكي جننتيني طيب منا سألتك في الموضوع أنا إفتكرتك شيماء طه و لما مردتيش قولت يمكن مش عايزة تعرفني بنفسها لكن لو أعرف من ساعتها كنت بعتلك على الخاص ... أنا مفتحتش فتكات من بعدها يمكن بكام يوم و لو دخلت دلؤتي هبعتلك على الخاص و لو مدخلتش دلؤتي بكرة بالكتير يكون عندك الأسم يا قمر .. و على فكرة هو مش سارة بس هو قريب منه أنا بس عايزة أقولك حاجة قالهالي أخ كبير و كنت في محنة شديدة قالي " في كل محنة منحة" أحياناً بتكون المحنة هي نفسها منحة عشان تعرفي اللي بيحبوكي من اللي بينافقوكي و منحة عشان تقربي من ربنا و منحة لحاجات كتير عمرك متتخيليها خللي غيمانك بربنا كبير و تأكدي إنه عمره مهينساكي و الدليل على كدة إن في ناس ميعرفوكيش بيدعولك من غير معرفة شخصية بيكي و أنا بقسملك بالله إني كنت فعلاً فكراكي النهاردة و بتمنالك إن ربنا يشفيكي و بجد والله إنتي من الناس اللي بحبهم في الله من غير معرفهم و بدعيلهم من كل قلبي


ساندريلا أنا الحمد لله محصليش قبل كدة مشاكل على النت بس واحدة صحبتي إتعملها مشاكل كتير بسبب الموضوع دا و بصراحة عقدتني للأسف في ناس بيكونوا متخصصين في جمع المعلومات عنك و إنتي مش واخدة بالك و أحيانا بيستغل بشكل سئ يعني مرة سؤال عن أسمك وموضوع بالصدفة تكتبي تعليمك و بعد شهر عن سؤال غير مباشر يتعرف منه إنتي ساكنه فين و هكذا الدايرة بتصغر كل شوية مش للناس اللي إنتي عايزاهم يعرفوا بس لكن أحياناً لناس ممكن حتى ميجوش على بالك

امممممممممممم عندك حق يا بيور محدش بيسيب حد ف حاله ف ناس وحشه كتير وعايشه بس عشان تعمل مشاكل وقلق للناس

sandrala كتب:

امممممممممممم عندك حق يا بيور محدش بيسيب حد ف حاله ف ناس وحشه كتير وعايشه بس عشان تعمل مشاكل وقلق للناس

أنا مش قادرة أقولك أنا عشت مع صاحبتي دي أسوء أيام بسبب موضوع النت دا للأسف في ناس بتتلذذ من ضرر الناس و خلاص ذي الهاكر و الناس اللي بتعمل الفيروسات أنا مش قادرة أفهم إيه اللذيذ إنك تتجسس على حد أو تخرب جهازه لمجرد إنك شخص ربنا كرمك بعلم في مجال الكمبيوتر أنا جهازي و جهاز إبن عمتي إتحرقوا بسبب فيرس مش قادرة أقولك كان يوم ما يعلم بيه إلا ربنا البوردتين إتحرقوا في نفس اليوم
ربنا يحفظنا كلنا و يهدي الجميع

ياساتر يارب فعلا والله معندهموش ضمير وقله دين وادب ربنا ينتقم من كل واحد بيخرب وبيعمل مشاكل لغيره وبيسرقوا ايميلات فعلا ويعملوا فتن ويبوظوا اجهزه ناس موش عارفه هيستفدوا ايه يلا ربنا ع المفترى وينجينا من كل شر وسوء ياااارب

ساندي كتب:

زيي بالظبط اي ار واناتومي وهااااااوس
دانا مهووسه بجد بيهم
ربنا يخليلك انس يارب اكيد غاااااالي اوي جاي بعد تعب زي حالاتي هههههههه
انتي عسل اوي يادينا بحس انك اختي الكبيره ودايما فكراني وبتسالي عني انتي وبيور بجد بحس انكم اخواتي الكبار
والله العظيم مش كلام

ربنا يكرمك يا شيماء انتي عارفة انا معنديش اخوات خالص وحيده ولما دخلت المنتدي حبيت يكون لي اخت فيه لقيت بقي لي اخوات كتير واصحاب كتير ربنا يديم المعروف مابيننا
ومعلش امبارح خرجت فجأه بس انس كان عايز ياكل وعمال يجي جنب الكومبيوتر عايز يطفيه عشان اقوم اعشيه وعمال يزعق لي معترض اني مشغولة عنه بحاجه كانه بيقوللي انا اهم قومي يللا عشيني خليني اعرف انام !!!!!!!!!!!!!عيال اخر زمن!!!!!!!!!!!!!!!

Pure Snow كتب:

دينا حلو موضوع البرتقال دا ههههههه ...الماسك دا فعلاً ناس كتير شكروا فيه بس أنا مجربتوش ربنا يسهل لو نازل بسعر حلو هشتريه إن شاء الله .. موضوع روز أنا فعلاً شوفته أول متعمل بس متبعيتوش لإنه كان في بداية تعبي و غيبت الفترة اللي فاتت و معرفتش أخباره إيه و ساعتها كنت لسه مسجلة في فتكات و موقعين تانيين .. في فتكات سجلت لأنه كان في موضوع كان لازم اشكر صحبته عليه و الموقعين لإني كنت عايزة أستفسرعلى حاجات و خوفت ساعتها أكتب أسمي بما إني سجلت في كذا موقع

ساندي حراااام عليكي جننتيني طيب منا سألتك في الموضوع أنا إفتكرتك شيماء طه و لما مردتيش قولت يمكن مش عايزة تعرفني بنفسها لكن لو أعرف من ساعتها كنت بعتلك على الخاص ... أنا مفتحتش فتكات من بعدها يمكن بكام يوم و لو دخلت دلؤتي هبعتلك على الخاص و لو مدخلتش دلؤتي بكرة بالكتير يكون عندك الأسم يا قمر .. و على فكرة هو مش سارة بس هو قريب منه

الماسك ده دايما يا بيور بينزل 1+1 او ب24 انا كنت جايباه من 1+1
هو المنتدي كلة مسجل في فتكات ولا ايه ؟؟؟؟؟؟؟؟؟؟؟؟؟انا كمان على فتكات خلاص نتقابل هناك اطلعولي بره
بمناسبة الفيروسات والحاجات بتاعه النت
انا مرة دخلت على موقع بتاع روايات وحاجات من دي موقع محترم جدا والله بس واحد مش محترم ربنا يسامحه بقي
حط عليه تروجانات اللي يدخل يستضيف عنده تورجنين على جهازة ده غير السباي وير والحاجات الظريفة دي
والله يا بنات كنت ابقي نايمة في الأوضه وقافلة النور والكومبيوتر وكل حاجه والاقي فجاه الكومبيوتر اشتغل لوحده زي ما يكون بسم الله الرحمن الرحيم كده راكبة واوقم اقفلة -رغم اني ببقي قافلاه- بس يتقفل وشوية كده ويرجع يشتغل تاني لوحده
كانت ليلة رعب !!!!!!!!!!!!!!111
لحد ما فصلت الكهرباء عنه وتاني يوم كلمت المهندي جه فرمت الهارد كلة مس السي بس لأ الارد كلة وكل البيانات اللي عليه ضاعت!!!!!!!!!!! منهم لله حاجتي وذكرياتي وشغل ماما والرسايل بتاعه الطلبه ومجهود اكتر من 4سنين كلة ضاع في لحظة!!!!!!!!!!!!!!

ساندي كتب:

لسه يادينا والله الهمجلوبين عمال ينزل ينزل مع اني باخد حقن هرمونات غاليه جدا ب 2750 باخد 2 فالاسبوع
ومش بيترفع بالعكس بينزل وبقي 6
وهوالمفروض يبقي 13
وكذا دكتور هيتجنن مش عارفين السبب وبعت تحاليلي بره مصر
وعاوزين ياخدوا عينه من النخاع والبتاعة دي صعبه اوي
عملتها مره قبل كده كنت هموت منها مش عاوزه اعملها تاني مع اني شفت اصعب من كده بس مش عارفه ليه خايفه اوي
جايز خايفه من النتيجه مش من التحليل نفسه
ادعولي اوعوا تنسوا

الف سلامة عليكى وربنا يشفيكى يارب انا هدعيلك في كل صلاة وتخفيش انشاء الله كل خير وادعى دايما وقولى
اللهم اصرف عنا شر ما قضيت