عضوة جديدة ومحتاجه رد على استفساراتى

السلام عليكم
اعزائى اعضاء المنتدى
انا عضوة جديدة معاكم .....وعضوة جديدة فى اوريفليم
وكنت عايزه استفيد من خبراتكم
انا ليا كام سؤال فى الكتالوج الجديد 13
اول حاجه سؤالى على الماسكرا ومحدد العين بخصم 60 % لو اشتريت من الكتالوج ب 200 ج
ممكن حد يفهمنى يعنى ايه
يعنى لو ما كملتش مبلغ 200 ج يبقى مش هاعرف اشترى الماسكرا ولو كده يبقى هاخدها بكام؟؟؟
وهل ال 200 ج من سعر العضوية ولا سعر الكتالوج ؟؟؟
وهل ال 200 ج دول على اوردر واحد ولا ايه؟
ولازم اخد الماسكرا ومحدد العين مع بعض ولا ممكن اخد الماسكرا بس؟؟

ثانى حاجة: انا باعمل الاوردر بتاعى عن طريق النت ...فلو عايزه اخد برفان ديفين اللى فى ص 27 وعليه كريم الجسم ومزيل العرق هديه ...اكتبهم ازاى فى الاوردر ؟؟يعنى اكتب كود البرفان بس وهم يضيفوا الكريم والمزيل اوتوماتيك ولا اكتب كل الاكواد؟؟؟

الحاجه الثالثة اللى عايزه اسأل عليها ...معلش سامحونى رغايه اوى
انا عملت العضوية الشهر اللى فات يعنى ينطبق عليا برنامج الترحيب بتاع شهر 11
كده هدية الترحيب هتجى لى اوتوماتيك مع الفاتورة ولا انا اكتب الكود بتاعها وخصوصا انها المفروض اختيارية يعنى هاختار من مجموعتين..اعمل ايه ؟؟؟؟؟

رابعا معلش اخر سؤال خلاص...
فى كتالوج 11 اللى فات حققت مستوى بس مش عارفه 3 ولا 6... كده ليا مكافأة وحسب ما فهمت هتتخصم من ثمن الاوردر وانها بتنزل يوم 5 فى الشهر تقريبا
السؤال اعرف ازاى انها نزلت وهتتخصم من ثمن الاوردر الجديد وكده هى هتنزل على يوم كام لان الكتالوج مش بادىء من اول يوم 1 فى الشهر زى الشهور العادية ؟؟؟؟؟؟

معلش يا جماعة انا عارفه انى دوشتكوا ... بس يا ترى هلاقى حد يرد على استفساراتى ؟؟؟؟؟؟؟؟؟؟؟؟؟؟؟؟

اهلا بيكي يا خيال معانا و انا هرد علي الاسئلة اللي انا متأكدة من اجابتها

اول حاجة ال 200 جنية دول بسعر الكتالوج يعني بسعر العضوية حوالي154 جنية

لو انتي معملتيش اوردر بالمبلغ دا فا انصحك ماتطلبيش الماسكرا و الكحل لأنك كدا مش هتستفيدي بالخصم اللي عليهم و هتاخديهم بسعرهم الاصلي يبأه ملوش لزوم لأنهم بينزلوا و عليهم خصومات

بالنسبة ال 200 سعر الكتالوج اعتقد لازم يكونوا في فاتورة واحدة عشان ينزلك بالخصم

بالنسبة للكحل و الماسكارا لازم الاتنين مع بعد احنا بصراحة سألنا كتير في المنتدي بس محدش فادنا بس اعتقد لازم الاتنين مع بعض لأنه كاتب -مجموعة من-لو كان ينفع حاجة واحدة بس كان كتب -اي من المنتجين بخصم 60%- ودا تخميني الشخصي

لو انتي بتعملي الاوردر علي النت او الفرع او علي الفون لازم تملي كود مجموعة ديفين كلها و كمان هدية الترحيب بتلاقيها نزلتلك لما تكتبي كودها علي النت بتنزلك ببلاش

اخر سؤال بأه يا رب حد يفيدك عشان انا مش بعمل مستويات بجيب حاجتي الشخصية بس

شكرا لك يا سومة على الرد ... ربنا يكرمك يا رب
بجد انا مش عارفه اشكرك ازاى

بس يا ريت حد يقولى رد على موضوع المستويات علشان اقدر احدد هاطلب الاوردر بتاعى امتى
على فكرة انتوا جروب لذيذ اوى فعلا
وقرأت بعض الموضوعات فى المنتدى وعجبنى التفاعل بينكم
ماشاء الله
مش حسد ولا حاجه
بس ابقوا بخروا برضه احتياطى
ههههههههههههههه

ميرسى على الرد والاهتمام يا مدام رشا
كل سنة وانتوا طيبين بمناسبة رأس السنة الهجرية
كده انا الكتالوج اللى فات كنت فى المستوى 6 يبقى ليا مكافأة
بس خانة discont بصيت عليها دلوقتى لاقيتها صفر !!!!
اتصل بالخط الساخن اعرف قيمتها كام واقولهم يخصموه من الاوردر لما اعمله من على النت ولا لازم اعمل الاوردر من الخط الساخن ؟؟؟
واعمل الاوردر امتى على النت علشان تكون المكافأة نزلت ؟
معلش بقى رغايه وبادوشكوا معايا

ايه يا جماعة انا حسدكوا ولا ايه ؟؟؟
محدش قالى اعمل ايه

ومعلش بقى يمكن حد يعرف يقولى رد على السؤال ده كمان
لو عايزه يتبعت لى 2 كتالوج الشهر القادم مع الاوردر مش كتالوج واحد
اضيفه ازاى للاوردر ع النت؟؟؟؟؟؟؟؟؟؟؟؟؟؟؟؟؟؟؟؟؟؟

يا رب حد يعرف يفيدنى

أهلا بيكى معانا ويارب تلاقى رد لاستفساراتك
بصى اتصلى على19662 واطلبى منهم يخصمو المكافأه من الاوردر اللى جاى هيبعتو ميل لللاستاذ ابراهيم بالافاده بس ما تبعتيش الاوردر الا بد5 او7 ايام من بدايه الكتالوج الجديد
ثانيا وانتى بتبعتى الاوردر قبل ما تسيفى هتلاقيهم كتبولك الكتالوج الجديد خدى الكود بتاعه وارجعى تانى اكتبيه واكتبى العدد اللى انتى عايزاه بس بينزل ب4.5 مش ب4زى الاول

السلام عليكم
أشكرك Boboss elshaky
على الرد وهاحاول اتصل بكرة ان شاء الله بيهم لانى اتصلت من شوية محدش رد عليا
ربنا يسهل
ميرسى لكم جميعا وربنا يوففكم كلكم يا رب