حد يقدر يفيدني :(

نفس مشكلتك الاولي عندي
حتي لما بعمل حاجات مخصصه للتساقط
بلاقيه زاد جدا جدا

بسع لي فكره معلومه بسيطه
لو حمام كريم اوعي تحطيه علي فروة راسك لانه بيوقع الشعر ويضعفه فعلا
يتحك من بعد المنابت بشويه لحد الاطراف بس ابعدي عن الفروه خالص

ساندي كتب:

نفس مشكلتك الاولي عندي
حتي لما بعمل حاجات مخصصه للتساقط
بلاقيه زاد جدا جدا

بسع لي فكره معلومه بسيطه
لو حمام كريم اوعي تحطيه علي فروة راسك لانه بيوقع الشعر ويضعفه فعلا
يتحك من بعد المنابت بشويه لحد الاطراف بس ابعدي عن الفروه خالص

انا والله مش عارفة أعمل إية يا ساندي أنا من أسبوع عملت حمام زيت و على حد علمي حمام الزيت بيتم تدليك الزيت دافي من فروة الشعر للأطراف و عملت كدة و دلكت فروة راسي عشان الدورة الدموية و بعد كدة و أنا بغسلة لقيته بينزل بشكل فظيع
كمان النهارة عملت حمام كريم هير اكس الأصفر بس بصراحة أنا معرفش معلومة حمام الكريم دي ربنا يجازيكي خير أنا مش بدلك راسي بية زي الزيت بس بدعك شعري كله بعد مبحطه على الأطراف و طبعاً النتيجة كانت و أنا بغسلة زي حمام الزيت و مش قادرة اقولك وقع قد إيه بالرغم إنى كنت لسة غسلاه بالشامبو و البلسم و موقعش

شكراً يا ساندي ربنا يخليكي يا قمر و إن شاء الله هعمل زي مقولتيلي في الكريم بس يارب حد يقدر يفيدنا بشكل عام و يقولنا نعمل غيه في الأزمة دي

انا الحمد لله معنديش وقت لحمامات الزيت والكريم لكن شعري برضة بيقع لعوامل التعريه المعروفة للبنات

بصي انا استعملت مجموعة هير اكش الفضي هو ماوقفش السقوط لكن قلله المشكلة اني وقفته كام يوم رجع يقع زي ماكان

انا كنت زمان بستعمل زيت خروع من عند العطار اللي مش من منتجات شركة زي اصالة والحاجات دي لا الأصلي بيبقي تقيل قوي بتجيبيه وبتحطي حبه في ايديك وبتلفيها عليه لحد ما يسيح شويه وبتهدني بيه شعرك بعد كل غسلة هو ريحته مش فظيعه ولا نفاذة بس مشكلته معايا اني شعري دهني وهو دهني فالحياه معاه مستحيلة في الصيف لكن في الشتا كنت بستعملة ومش عارفة اقولك على النتيجة شعري تقل جدا وبقي فيه لمعه حلوة بعد كده مبقيتش الاقي الزيت عند العطارين بلاقي اصاله ولما جربته معجبنيش ريحته كانت فظيعه ومخززة لكن اكتشفت ان فتح الله ماركت عندنا في اسكندرية بيبعه فحشتري منه واجربه

اتمني اكون افدتك ومصدعتلكيش دماغك على الفاضي

انا جربت برضه الخروع والله يادينا ومش عمل اي حاجه

ان حتي جبت زيوت ب 35 جنيه
وعملت خلطه من النخاع والزيوت دي
كان في بنات كتير بتشكر في الوصفه دي خالص
وانا ماليش في الحاجات دي ولا عمري عملتها
بس كان عندي حمام كريم بالنخاع وكان حلو اوي معايا
فقلت لما اجرب الموضوع طالما نخاع
هو خلي شعري تتتتتتتتتتحفه
ناعم اوي اوي اوي ماشاء الله
ومش هايش ولا مقصف كالعاده
وفضل اكتر من اسبوع يلمع كاني لسه غسلاه وكان طري جدا ماشاء الله
لكن للاسف المشكله اللي انا عملاه عشانها اصلا مراحتش ولا حتي قلت وهي التساقط
لكن انا اصلا عندي انيميا حادة من الغسيل والعلاج وكده
والدكتور قالي التساقط مش بسب عدم العنايه
وانه بسبب الانيميا
فلو عاوزين تعرفوا الخلطه دي اقولهالكم بالتفصيل وتجربوها عمرها ماهتضر يعني

شكراً يا دينــا على النصيحة ربنا يبارك فيكي بس أنا فعلاً عندي زيت الخروع و بعمل بيه بس للأسف مش عامل حاجة أنا شعري مش بيقع إلا لما بكون تعبانة أو الأنيميا زايدة لكن أنا مشكلتي بس أنه عند عمل حمام الكريم أو زيت بيقع بشكل فظيـــــــــــع مش قادرة أقول الكمية بتكون قد إية بتهيألي كمان مرتين تلاتة و مش هلاقيه
ســاندي ربنا يحفظك و يتم شفائك على خير و ألف سلامة عليكي
ياريت لو تقدري تكتيبلنا الوصفة دي هي فعلاً اكيد مش هتضر و يمكن ربنا يسهل و تنفع خاصة إنها طبيعية و أنا بفضل الحاجات الطبيعية عن المنتجات التجميلية
شكراً ليكم يا قمرات بجد مش عارفة أشكركم إزاي على ردكم و اهتمامكم

ماشي الطريقه اهي
انا خليك جابتلي من عند الجزار ماسوره وينظفها يعني واخدت 3 جنيه علي الموضوع ده
وجبت من العطار زيوت
زيت خروع
زيت ثوم بس بلاش منه هو مفيد جدا اه لكن ريحته صعبه صعبه صعبه مكنتش طايقه نفسي
اصلي حطيت كتير بس خليها نص معلقه
وزيت سمسم
وزيت جرجير
الاربعه دول مع النخاع كانوا ب 25 جنيه
وافضل زيوت هي زيوت شركة الكابتن لانها نقيه ومستخلصه علي البارد
وكان عندي زيت جوز هند وزيت ياسمين
وسال تواحده صاحبتي اعمل ايه في الرائحه النفاذه بتاعة الثوم
قالتلي هاتي زيت برفيوم خام من عند بتوع تركيب العطور
وضيفي منها نقطتين تلاته ع الخلطه
وفعلا يعني خففت الرائحه شويه
وممكن تزودي اي زيوت تانيه من عندك انا مثلا حطيت املا وسباركل
بس حاسه ان انا كترت الزيوت اوي
المهم بتاخدي النخاع ده وتحطيه في طبق في الفرن او في حمام مياه
لحد مايسيح
هو هياخد وقت علي مايسيح بس تابعيه
وبعدين تصفيه في طبق وتحطي عليه من الزيوت وهو دافي لسه
بنسب متساويه انا حطيت معلقه من كل حاجه
بس خدي بالك تاني من الثوم
وبعدين حطيته في علبة كريم قديمه عندي
اه صحيح انا ضفت عليه شوية خل عشان كان عندي قشره وفعلا اختفت بعدها
وبعدين سبته يبرد لحد مابقي عامل زي الكريم وسبته في التلاجه
وتاني يوم غسلت شعري
( مش عارفه بصراحه بيتحط علي شعر جاف او مبلول بس انا قلت يبقي نظيف افضل )
وبتسبيه علي شعرك من 3 ل 6 ساعات علي حسب طول شعرك بس مش اقل من 3
وبعدين اغسلي شعرك واستني لما ينشف
وسرحيه وادهني زيت او كريم بسيط اوي اوي
وبس كده

بس معلومه تانيه دايما لما يكون شعرك مبلول سرحيه بمشط بلاستيك
انما لو ناشف يبقي مشط خشب

وربنا شعرك يبقي زي شعر الهنود :)

تسلم ايدك ياساندي انتي ودينا

علي فكرة انا لما كنت بدخل فتكات كل فتكات بتحكي عن موضوع النخاع ده بس مجربتوش خالص

د وردة ياريت تقوليلنا طريقتك برده

معلش هتبعك

يا بنااااات على فكرة انا بتعالج ناو عند دكتوره جلديه شاطره جدااا عشان التساقط دة

وقالتلى حاجة مهمه جدااا

اساسا اى حاجة للتساقك بتبان نتيجتها بعد من 6 -8 اسابيع تمام كمااان انك هتلاحظى فى اول الاستخدام الشعر بيقع بكثافه شديدة مش معناه ان العلاج م كويس بالعكس لانه هوا كده بدا مفعوله لانه بيوقع كل الشعر الضعيف اساسا والمفروض كدة كدة واقع ويبدا بمعالجه الشعر وتقليل سقوطه بالتدريج

وشكرااا

شكرا يا ساندي

شكرا يا وردة

شكرا يا روز انا فعلا سمعت حاجة زي كده

انا لما اقترحت الخروع كان شان انا بحب الحاجة الواحدة ومفيش وقت اعمل اي حاجة واحط حمام كريم ابني حيشد شعري وياكلة قلت دي حاجة واحده بس الخلطات شكلها حلو ححاول انيمه واعملها بس يارب مايصحاش وانا حاطاها

يارب

على فكرة علشان كل الوصفات دى اكتر من ممتازة بس هى عايزة المواظبة عليها علشان تجيب نتيجة زى ما قالوا البنات
بس علشان الحجاب انصحط تحطى طقية قطن على شعرك تحت الحجاب بجد ليها تاثير
وجربى وهتشوفى