كريم اساس جيوردانى مضاد لتقدم العمر

انا عندى كريم اساس جيوردانى مضاد لتقدم العمر وعاجبنى اوى بس قالولى انه معمول ل فوق ال 30 سنة وانا عندى 25 وكنت عايزة اخد رايكم هل هو كدة ممكن يضر ببشرتى ولا ايه ؟؟؟ مع العلم انى مش بستعمله غير فى المناسبات والافراح بس .. ياريت تفيدونى

طب لية نجيب اللى مش لسننا مدام فية بديل ونفس الماركة
ياعسولة انتى صغيرة لو بشرتك مدياكى سن أكبر دة هو السبب الوحيد اللى يخليكى تجيبى حاجة مش لسنك
جيبى جيورديانى الطحالب أو العادى احسن وبنزلو فعروض حلوة أحسن من كدا

لا انا بشرتى مش مديانى سن اكبر ولا حاجة بس انا جبته عشان كان نازل بسعر حلو ومخدتش بالى انه مضاد لتقدم العمر ف مش هرميه يعنى بس هو دة الموضوع

أنا أول مرة أعرف ان جيورداني المضاد لتقدم العمر لسن فوق التلاتين كريم اساس جيوردانى مضاد لتقدم العمر 705119

و أنا بستخدمه من سنين صحيح ان انا مبستخدموش إلا في المناسبات و غالباً بتخلص صلاحيته و هو مليان بس مش بستخدم غيره أنتوا متأكدين إنه لسن فوق التلاتين ؟

لا انا مش متاكدة دى واحدة قالتلى كدا انا بسالكم عشان اعرف هو فعلا لسن فوق اال30 وهل هيضر ببشرتى ولا ايه انا بردو بستخدمه ف المناسبات بس وانتى حاسة انه كويس معاكى مش ضر بشرتك ..؟؟؟

بصراحة أنا مش بحس انه بيضر بشرتي بس لاحظي إني بحطه نادر جداً كمان الكريمات الأكبر من سنك أو المش مناسبة ليكي بيكون ضررها غالباً مش لحظي يعني ممكن جداً يكون بيتعب بشرتي على المدى الطويل و أنا مش قادرة أحدد خاصة إني بالفعل بشرتي مجهدة جداً من عوامل كتير تانية زي عوامل الجو لإني كنت بتعرض في شغلي أوقات طويلة لتراب و شمس كمان أنا عندي أنيميا الفترة دي فده مأثر على بشرتي الفترة دي و بالتألي أكيد هيكون صعب جداً عليه إني أحدد هو بيضر بشرتي و الا لأ بس لو أتأكدنا انه فعلاً لأكبر من 30 سنة طبعاً لا يفضل تماماً إنك تستخدميه انا خلاص مش مهم الكام شهر دول خاصة إني بستخدمه من سنين لكن إنتي حرام عليكي تجهدي بشرتك بحاجة أكبر من سنك بس يارب حد يفيدنا و يأكدلنا المعلومة أو ينفيها

لا مش فوق سن معين ولا حاجه عادي جدا
معني انه مضاد لتقدم العمر انه بيحافظ علي ترطيب البشره لان كل مابيتقدم بينا السن بشرتنا بتفقد ترطيبها الطبيعي
انا شخصيا بستعمله بس مش بحبه لانه بيسمرني
وهو طبعا مش ينفع للي بشرتهم دهنيه لان زي ماقلت فيه نسبة ترطيب عاليه وممكن يسيح

لو هو كويس معاكم استعملوه عادي يابنات

والله ك واحدة تعمل اللى يريحها وكلام بيور مظبوط التأثير مش فساعتها بس أنا مش بحب الواحدة تستعمل حاجة مش ليها بدون سبب
معلش مش هعرف مردش على ساندى وأقول يستعملوة لا.. لأن ظاهرة أساس عادى بس مش لسنكم أولا بيدارى تجاعيد ويملا حجات لبشرة كبيرة ياجماعة أنا بدية لناس معدية ال50 ودة كلامهم أنة بيدارى وبيسيب البشرة مفرودة أنتى هتفردى أية اية اللى فوشك مكرمش؟؟؟
وعادى يامنمن ممكن تبيعية وهيكون سهل جدا جدا ومفهاش حاجة لو قعد عندك شهر ولا أتنين
بليز يابنات محدش يستعمل حاجة مش لسنة ألا لو بشرتك سبقة سنك دة بيسبب جهد ليها قدام زى بالظبط لما تخدى فيتامين زيادة عنك شوية شوية هيبان أنة مش صح

انا كمااان من راى ساد

ميرسى ليكى ياساد بس انا مش عضوة فى اوريفليلم عشان اعرف ابيعه انا بشترى من عضوة وبما ان انتى من كفر الشيخ ممكن اعرف منين عشان احنا طلعنا بلديات

أنا من دسوق تحديدا يا قمر وأنتى؟؟

عادى برضة ياقمر قولى لأصحابك وقولى للعضوة نفسها لو حد طلبة تاخدة عشان أصلا كان المفروض هى تنبهك قبل متجيبة بس معلش أكيد هى متعرفش أو مخدتش بلها

بلاش تستخدمو حاجة مش لسنكم

انا ماما استخدمت تايم ريفرس لسن فوق ال 55 ووهي اصغر من كدة

بوظ وشها

يا هند غير أنة كبير عليها التايم ممتاز بس للبشرة الجافة كان ولبشرة غيرها أثرة الضار بيكون أكبر من الكريمات التانية وأنا قصدى عالموف على فكرة لو الاسماء أختلطت عليا
لو قصدك البنى برضة ممتاز بس الضرر ممكن بالفعل يكون عشان السن

فعلا معاكي حق ياساد

بشرة ماما دهنيه واستخدمت البني

وبهدلها بشرتها ونشفت ووشها ورم وهي مرة يتيمة ال استخدمته

ودلوقتي مرمي جوه

يلا الحمد الله

انا من بيلا ياساد بس بردو بلديات محافظة واحدة عموما اهلا بيكى ياقمر

علي فكرة يا جماعة انا بستخدم النوع ده من اكتر من سنة و حلو جدا معايا احسن من اي حاجة تانية جبتها معاه و لاحظت حاجة العلبة الي خلصت منه كانت اغمق باكتر من درجة من العلبة الجديدة رغم ان الاتنين بورسيلين و اخف منها شوية في السيولة بس بينفرد اصعب من التاني يمكن عشان فاتح انا استغربت قووووووووي

على فكرة انا باستخدم كريم الاساس جوردانى من زمان واخواتى كمان وهما سنهم اقل من سن ال30 وحلو قوى وكمان انا سالت عليه خبيرة التجميل اللى فى الشركة فقالت انه مضاد لتقدم العمر يعنى فيه مرطبات اعلى بس يعنى مناسب جدا للى بشرتهم جافة ومتخافيش وعلى فكرة انا جربت كريم اساس جوردانى العادى مطلعش حلو على وشى مضاد تقدم العمر احلى كتير وكلب صحابى فى الشغل بقوا بيستخدموا هما كمان كريم اساس جوردنى تقدم العمر صدقينى متخافيش

ميرسى ليكى يانيكول وعموما انا بستخدمه ف الافراح والمناسبات مش يوميا يعنى

الحمد لله

والله كويس ممكن تستخدموة وكل واحد حر فأختيارة بس بلاش يا منمن لأن بشرتك دهنية وفيها حبوب ولا مش أنتى واحدة تانية؟؟؟ Rolling Eyes

مش فاكرة لو أنتى بلاش بجد

ايوة انا ياساد بشرتى مركبة دهنية رايك انى مستخدموش ؟؟

لأ يا مونمن لو بشرتك دهنية مش هينفع خاااااااااااااااالص يا جميل كريم اساس جيوردانى مضاد لتقدم العمر 140564

لأنه زي ممعظمنا قال أنه في نسبة مرطب و بالتالي هيزود الحبوب في وشك و ده من تجربة اختي لأن بشرتها دهنية و جربته مرة واحدة في كتب كتاب اخويا و عقبال مرجعنا من كتب الكتاب كان وشها باظ من الحبوب لكن أنا بشرتي جافة و عشان كدة بفضل كريم الأساس يكون كريمي مش مت و عشان كدة شغال كويس معايا

انا زى ماقولتلكم بحطه ف الافراح وبحطه من فترة يجى من سنة بس مش لاحظة انه بوظ وشى ولا حاجة بس هاحاول ابيعه واجيب حاجة انسب ليا اصله لسة مليان زى مهو بس اكيد هبيعه بسعر اقل عشان استخدمته

معلش حتى لو بيعتيه بسعر اقل افضل كتير من انك تشتري بعد الشر حاجات تانية كتير عشان تعالجي وشك من آثاره و انتي لسه صغيرة حرام

انا هاخد بنصيحتكم وهبطله بس ايه احسن حاجة من جيوردانى غير دة مناسبة ليا ؟؟

بصراحه كريم جميل جدا ومن احسن انواع الكريمات الاساس فى اوريفلام وبستخدمه بقالى سنتينونا سنى اقل من 30 ومش بيدى طبقه دهنيه للبشره هوه كل الحكايه ان فيه نسبه مرطبات عاليه للسن ده فحتى لو استخدمناه ايه المشكله اعتقد يخافظ على بشرتنا اكتر طالما منتجات طبيعيه

monmon mony كتب:: انا هاخد بنصيحتكم وهبطله بس ايه احسن حاجة من جيوردانى غير دة مناسبة ليا ؟؟

انا مش عارفة إيه ممكن يناسبك يكون كويس إن شاء الله حد يفيدك بسرعة
كلام مرمر صح هو فعلاً مش بيكون طبقة دهنية هو في نسبة ترطيب عالية انا بشرتي مختلطة لجافة بس لو استخدمته في الصيف بحس إني مضايقة لغاية محط البودر خاصة اتعرضتي لشمس و حر و طبعاً الكارثة الأكبر التراب لإنه بيلزق فيه صحيح هو مش مدهنن زي السن بلوك بس ده ميمنعش إنه كريم مرطب مش مت
أنا اعتقد ان الكريمات المت هي الأفضل للبشرة الدهنية لكن كريمات جيورداني سواء المضاد لتقدم العمر او الأدبيكتيف أو الطحالب كلها كريمية مش مت معتقدش إنها تناسب البشرة الدهنية خاااااالص و أنا شخصياً بعد مأختي وشها باظ في فرح أخويا قولت لو جت مناسبة تاني مش هخليها تستخدمه و هحاول أسأل على كريم مت مناسب ليها

monmon mony كتب:: انا هاخد بنصيحتكم وهبطله بس ايه احسن حاجة من جيوردانى غير دة مناسبة ليا ؟؟

ممكن بقا تستخدمى سكين بيرفكت المات بس دة مش تبع جيوردانى

انا مش بستخدمه بالنهار خالص هو كل الحكاية انه لو فرح بليل بس وبرجع بشله عشان كدا بستخدمه من سنة وحاسة انه كويس لان بشرتى مختلطة يعنى دهنية بس ف منطقة التى نوز وباقى وشى عادى
وميرسى ليكم ع روددكم ونصايحكم الجميلة

» كريم اساس جيوردانى جولد
» كريم جيوردانى المضىء
» كريم ملمع جيوردانى حد جربه
» جوردانى لتقدم العمر؟؟؟؟؟؟؟؟؟؟؟؟
» ايه رايكم فى شامبوهير اكس المضاد لتقدم العمر الفوشيا