هدية العيد لكل المحجبات

أولا وقبل أي شيء...
نحب إننا نوجه أجمل التهاني لكل الأعزاء بمناسبة قدوم عيد الأضحى المبارك أعاده الله عليكم باليمن والخير والبركات وإن شاء الله يكون عيد سعيد على كل الناس

طبعا في العيد بتكتر الخروجات والفسح والزيارات العائلية.. وأكيد نفسك إنك تظهري بمظهر جديد غير المظهر اللي إنت متعودة عليه..علشان كده نقدم ليكم بعض ربطات الايشاربات

دي مجموعة من الربطات الإسبانش للبنات اللي بتحب إنها تلبس إسبانش بس في نفس الوقت بتحب الطرحة تكون مغطية منطقة الرقبة.. وعلى فكرة مجموعة الربطات دي بسيطة جدا وسهلة في التنفيذ بس أنتِ امشي واحدة واحدة زي ما إحنا هنقولك ولو أول مرة ما طلعتش الربطة مضبوطة معاكي جربي تاني وإن شاء الله هتطلع معاكي مضبوطة وزي الفل..
1- هتجيبي بندانة قطن وتلبسيها بعد كده هتجيبي إيشارب طويل وتحطيه في منتصف رأسك...
2- هتجيبي دبابيس علشان تثبتي الإيشارب في منتصف رأسك... هتجيبي أحد أطراف الإيشارب وتلفيه حوالين رقبتك وتثبتي طرف الإيشارب بدبوس على أحد الأجناب.
1- هتجيبي إيشارب طويل وتربطيه كويس من الخلف وياريت الربطة دي تكون حوالين كحكة شعرك... هتجيبي الإيشارب التاني وتحطيه من قدام بطريقة مائلة بحيث إن جزء من الإيشارب الأولاني يبان وتربطيه من الخلف..


2- هتلفي أحد أطراف الإيشارب الأول حوالين كحكة شعرك مرة واحدة وتثبتي الطرف ده بالدبابيس كويس وتسيبي الطرف التاني علشان تعملي بيه ضفيرة... هتجيبي أحد أطراف الإيشارب الثاني وتلفيه حوالين رقبتك وتثبتيه بدبوس من على الجنب.
3- هتمسكي الطرف الثاني من كل إيشارب وتضفريهم مع بعض.. وتسيبي الضفيرة دي على ظهرك أو على كتفك..
على فكرة ممكن تبتكري حاجات تانية في اللفة دي زي مثلا إنك تحطي الإيشارب التاني بشكل ثابت على رأسك مش مائل بحيث إن جزء بسيط من الإيشارب الأولاني يبان.
1- هتربطي شعرك بالإيشارب من الخلف.. هتجيبي إيشارب تاني يكون لونه مناسب للون الإيشارب الأولاني وتحطيه في منتصف رأسك وتربطيه هو كمان من الخلف.
2- هتبدئي في إنك تلفي الإيشارب التاني حوالين كحكة شعرك وتثبتي اللفة دي بالدبابيس.
3- هتجيبي أطراف الإيشارب الأولاني وتربطيه حوالين رقبتك من الأمام.. على فكرة بالشكل ده ممكن تستغني عن الكوفيه الصوف اللي ممكن تلبسيها في الشتاء.
1. هتجيبي بندانة صغيرة وتربطي بيها شعرك وتجيبي إيشارب طويل وتحطيه في منتصف رأسك بطريقة مائلة أو عادية بس أهم حاجة إن جزء من البندانة يبان... هتربطي الإيشارب على أحد الجوانب وتجيبي أحد أطراف الإيشارب وتحطيه على رأسك..
2. هتجيبي دبابيس وتبدئي تثبتي طرف الإيشارب على رأسك بطريقة مائلة.. وتمسكي الطرف الثاني من الإيشارب وتلفيه على الجنب بطريقة فيها كشكشة مثلا أو على شكل وردة وتثبتيه بالدبابيس على جنب.
1. الربطة دي محتاجة يكون عندك إيشارب كبير جدا زي (الشال) مثلا كل اللي هتعمليه إنك هتلمي شعرك كويس وتعمليه كحكة إلى أسفل... وهتحطي الإيشارب وتربطيه كويس من وراء وتكون الربطة أسفل كحكة الشعر..
2. هتجيبي أحد أطراف الإيشارب إلى الأمام وتحطيه على منطقة الجبين.
3. هتلمي طرف الإيشارب من فوق الكحكة مع عمل كشكشة بسيطة وتثبتيها بدبوس..
1. هتجيبي بندانة وتلمي بيها شعرك.. وبعد كده تجيبي إيشارب تاني وتربطيه أسفل الكحكة.. وتبدئي في برم أطراف الإيشارب مع بعضها وتربطيها من الآخر كويس قوي
2. هتلفي أطراف الإيشارب حوالين الكحكة كذا مرة وممكن تلفيها كلها أو تسيبي منها جزء ينزل على الظهر أو على الكتف بس خدي بالك إنك هتثبتي اللي أنت بتلفيه ده بدبابيس.

الربطات كلها روووووووووعة بجد يا سوسى
تسلم ايديك وكل سنة وانتى طيبة وعيد سعيد

ربطات جميلة اوى....
شكرا ليكى اوى

مشكووووووووووووووورة جداااااااااااا

الربطات كلها جميلة يا قمر

تحفة وزوقك رائئئئئئئئئئئئئئئئع
يسلمو