كل واحد يدخل يكتب تجربته مع كل منتج استخدمه من اوريفليم

[center]انا كانت جاتلى فكرة كده واتمنى تشاركونى فيها عشان الكل يستفيد
ايه رايكم كل واحد يدخل يكتب رايه فى كل منتج من اللى جربهم وايه الحلو وايه الوحش وكده يعنى

سامع حد جاى فى باله دلوقتى انه يقوللى فيه مواضيع كتير بخصوص الكلام ده وبيحضر نفسه انه يحطلى كذا رابط لمواضيع مشابهه
انا عارف المواضيع دى وقريتها واستفدت منها جدا وكل اللى ساهمو فيها مشكورين
بس من وقت المواضيع دى لحد دلوقتى فيه ناس اكتر جربت حاجات اكتر وانا منهم انا كنت داخل اوريفليم وما كنتش اعرف عنها غير برفان واحد هو اسيندنت السودا لكن دلوقتى ما شاء الله كبرت وعرفت وجربت منتجات كتير ومنكم كتيييييييييييييييييييييييير زييى
طب ليه بقى ما نحطش تجاربنا هنا ونفيد نفسنا ونفيد بعض قبل ما نفيد الاعضاء الجديده
ايه رايكم
مش بس كده انا رأييى كمان نناقش آراء بعض ولو حد عايز يسال عن منتج يسال

لو حد رافض الفكر يقول جايز اكون فكرت غلط
واللى بيأيدنى يكتب تجربته مع المنتجات

شكرا لأحسن اعضاء لاحلى منتدى

طيب مانخليها علي حسب كل شهر لواحده
يعن بعد ماحد يطلب اورد ليه ويجرب المنتجات اللي طلبها يقول رايه فيها
ده هيساعد كتير خصوصا الناس اللي عاوزة تجمع نقط مش بيبقوا عارفين يشتروا ايه
وكمان كل واحد فين جرب زيادة عن 30 او 40 منتج فمحدش هيعرف يقول رايه في كل الحاجات دي
كل شهر هتبقي بس علي منتجات الكاتلوج ده واسهل بكتير
ده رايي
وشكرا علي الموضوع انا بحب الموضوعات دي وبستفيد منها جدا

متشكر على اهتمامك
انا بس كنت عايز اقول ان بالنسبه لمنتجات كل شهر فده بيحصل كل شهر ان بيبقى فيه موضوع تغطيه للكتالوج
لكن انا كنت قصدى ان يبقى في الموضوع كل التجارب بحيث ان كل واحد يدخل ويقرى اللى فيه يبقى كأنه جرب معظم منتجات اوريفليم ويقدر يحدد اللى محتاجه ويبقى مستنيه لما ينزل فى اى شهر
يعنى قصدى ان يبقى الموضوع كانه موسوعه

موسوعة فكرة كويسة علي فكرة
بس ده بيتهيالي هيحتاج حد يدير الموضوع عشان يكون منظم
بمعني انت مثلا تحدد ان هنبدا كلام عن البرفانات الرجالي
وكل واحد يقول رايه
وبعد كده البرفانات الحريمي مثلا
وبعدين منتجات البشرة مجموعة مثلا بيور سكن
وبعدين مجموعة الشاي الاخضر
وبعدين الشاور
وبعدين الاكسسورات
وكده لحد مانكون اتكلمنا عن كل المنتجات
ده اقتراح
انما مفتوحة كده احنا هنتلخبط والجديد بردده هيتلخبط

صح يا جيجي فكرة حلوة جدا يا مصطفي والموضوع حيفيد ناس كتير وانا معاكم حددوا اللي انتم عايزين تبدؤا بيه وليكن مثلا حاجة من اللي الناس كلها حتجيبها عشان الصيف زي الصن بلوك او مستحضرات مانعه للتعرق او مثلا الكريمات اللي بتنزلها الشركة خاصه للصيف وبتناسب اكتر طبيعته وهكذا
وكمان الناس اللي بتجرب منتج يكون نازل لأول مرة تدخل وتقول رأيها وتجربتها استخدمته ازاي مثلا وكده

انا موافقة
ونبدا ان شاء الله
اختاروا حاجة نبدا بيها

وانا كمان موافقه دا موضوع حلو قوى شكرا ليك يا مصطفى على الفكره دى

فكره جميله جدا ويبقي مرجع للي عايز يجرب برفان معين او منتج معين يعرف عنه كل حاجه قبل ما يجيبه من الناس اللي جربته انا معاكم وهكتبلكم كل حاجه جربتها وراي فيها بصراحه ووقت استخدامها وتناسب مين من اللي هيستخدموها ها هتبداو بايه؟

وانا معاكوا كمان

خلاص خلونا نبدا بالبرفانات الرجالي الاول
علي اساس ان مصطفي هو صاحب الفكرة ولازم اول واحد يستفيد
انا معرفش عنها اي حاجة غير نوع واحد اشتريته هديه قبل كده مش فاكرة اسمه
والجلاسير اللي كان هديه علي ال200 نقطة

فكرة حلوة

البارفانات الرجالى

جلاسير الزرقا جميلة وقوية ودايما مطلوبة

سول ريحتها قوية برضه

سيجنتور من البارفانات المميزة وريحتها مش مكررة كتير

s8 معجبتنيش اوى

جيوردانى مان برضه معقولة بس حاسة ان جلاسير احلى

جلاسير الزرقا احلى من جلاسير البيضا والاورنج

وعايزة اقولكم عن معلومة تفيدكم عند اختيار البارفانات ان البارفانات اللى داخل فى مكونها اخشاب بتبقى جميلة وتقريبا دا بيبقى دليلى لاختيار البارفان ودايما بيطلع جمييييييل

وعموما البارفانات دى ازواق فى ناس تحب البارفانات القوية وفى ناس تحبها هادية يارب تكونوا استفدتوا من كلامى

انا معاكم بس ليا رجاء الاول من باشمهندس مصطفي
ياتغير توقيعك ياتصغره انا ايدي وجعتني رايحه جايه بالماوس عشان اقرا بقيت السطر

انا كمان جبت الجلاسير الزرقاء ريحتها حلوه قوى هيا من البرفانات الهاديه والسول كمان عجبتنى والسجنتشر تحفه اما الارتكت حكايه دول اللى انا جبتهم اما الاسيندينت السودا اختى بتقول عليها جميله جدا هى شمتها مع واحده صاحبتها

ساندي كتب:

انا معاكم بس ليا رجاء الاول من باشمهندس مصطفي
ياتغير توقيعك ياتصغره انا ايدي وجعتني رايحه جايه بالماوس عشان اقرا بقيت السطر

اوك يا ساندى من عنيا حاضر واسف لكل اللى سببتلهم مشكله بتوقيعى ده
هو بس جه كده لانى كانت اول مره اجرب احط توقيع بس خلاص جارى تغييره

متشكر ليكو كلكو على كل الاقتراحات اللى اقترحتوها وانا بأيدفكرة asd1234 لانها هتنظم الموضوع اكتر طبعا
معلش دى من طبيعة شغلى انى مهندس مدنى بابنى البيوت وبعدين يجى السكان يفرشوها ويجهزوا ديكورها بنفسهم

وكمان متشكر ليها كمان مره عشان بدات بالبرفانات الرجالى لانها اكتر حاجه بجيبها وانا مغرم بالبرفانات
جدا جدا ويمكن دى اكتر حاجه هشارك بيها معاكم ومتهيالى بتهم برضه كل الناس

كنت بس عايز اضيف حاجه كمان عشان الموضوع يبقى بالقوه اللى بحلم بيها هى ان مش كل واحد يدلو بدلوه ويقول رايه ويمشى ... لا احنا عايزين نعلق على اراء بعض ونناقش اراء وتجارب بعض ولا ايه رايكم
كمان شكرا جدا لكل اللى تفاعل مع الفكره ولكل اللى شارك وكل اللى بيفكر يشارك

بالنسبه للبرفانات الرجال
بصفه عامه بدون استثناء انا ما شوفتش برفان رجالى فى اوريفليم ريحته وحشه (على عكس الحريمى مثلا ليا ملاحظات على بعض الحاجات بس لما نيجى لوقتها) يعنى مممكن ما تحبش برفان بس ما تقدرش تقول عليه ريحته وحشه ولو حطيته ما تبقاش زهقان منه او مضايق مش عارف ده رايى واللى من رايى يقول واللى شايف ان فيه حاجه وحشه يقول

انا هبدا باكتر برفان بحبه

الاسيندنت بيور (البيضاء): بصراحه برفان اكتر من رائع وبحبه جدا جدا وهو اول برفان جبته من اوريفليم على فكره
انا بحس ان ريحته اهدى وارق ريحة برفان ممكن تشمها
كمان لاحظت حاجه غريبه لما جربت التست اللى كان نازل فى الكتالوج بتاع برفان بارادايس الحريمى حسيت انه شبه الاسيدنت بيور اوى بس على اهدى كمان
الازازة بتاعته شكلها شييييك جدا وهو صناعه فرنسا75 مل وثباته فوق المتوسط
وعلى فكرة انا ناوى ان شاء الله ده اللى هاحط منه يوم فرحى

s8الابيض: البرفان ده كنت مستغليه بالنسبه لحجمه 50مل بس جبته فى العرض بتاع شم النسيم ده وقولت مش هيخسر
بس أول ما جربته رحت جبت منه اتنين كمان
بجد برفان حكايه واسطورى كده وبحس بانه مختلف كده مالوش زى هو ريحته عامله زى بتاعه كده عاملة زى الجلى كولا بس بالعرقسوس ريحته قريبه من كده واخده منها شويه بس على احساس رائع مش عارف ليهfeky
ما حبتهاش
الازازة بتاعتها لوحدهاحته ديكور صناعته فرنسى عيبه الوحيد انه 50 مل بس ثباته الرهيب يعوض حجمه رشه واحده منه كفايه


معلش اناايدى تعبت من الكتابه هاكمل الباقى بعدشويه
ومستنى تعليقم على رأيى

انا مش هعرف اشارك في البرفانات الرجالي ماعنديش خبرة فيها بصراحة
بس استفد من اللي كاتبتوه
بس طلب ممكن اخر مشاركة في البرفانات الرجالي
كل واحد يكتب بالترتيب كده ايه اكتر حاجة عجبته من الاحلي للاوحش
عشان نستفيد واكيد في نوعين اوتلاتة هنتفق كلنا انهم احسن حاجة
وكمان في البرفانات الرجالي ممكن نتكلم برده عن الاسبريهات ومزيلات العرق وفوم الحلاقة اللي بيكون نفس ريحة البرفان
يعن ايه رايكم فيه ؟؟؟ هل نفس الريحة والثبات ولا مختلف
عشان يبقي الموضوع شامل عن البرفانات

انا حبيت قوى الارتشكت والفلامبوينت ودول اكتر اتنين حبيتهم

اصلا اصلا اصلا مفيش برفان رجالي وحش في اوريفليم بجد دي اكتر حاجه بحبها في الشركه
حتي الافترشيف كلهم يجننوا
هي بس بتبقي درجات وراحه نفسيه للبرفان
حتي الجلاسير الازرق مع انه في الضياع دقيقه ويطير ومع ذلك بحبه جدا جدا ادمان يعني
علي فكرة مع اني بنت بس مش بجيب لنفسي برفانات حريمي خالص
بجيب للي بيطلب بس
انما بجيب لنفسي برفانات رجالي واقعد اشم فيها اصلي شمامه ههههههههههه
و ده لاني اصلا مش بحط بره البيت برفيوم عشان حرام

شوفو بقى أنا ممكن أقول أية اللى مش عجبنى لأن بصراحة مفيش حاجة معجبتنيش وأنا من النوع اللى بجرب قبل منصح الناس عشان أفهم المنتج ونتيجتة الاول
أمممممم
مش عرفة ممكن مجموعة الكونسيلر الثلاثية دى معجبنيش فيها بس حجمها لكن غير كدة هى تحفة بجد
والميراج مش بتعجبنى نهائى ولا البريشيوس الدهبى
وبحب الميوز والديفين الحمرا والدى لايت والجيورديانى وايت حببتى والبراديس جميلة برضو والمس أو الزرقة والدهبى
الرجالى
الفلامبوينت تحفة جدا وشيك قوى والجيورديانى البنى والسيجنتشور بحبهم جدا

انا شخصيا عجبتني الأركتكت - على اسم مهنتك يا بشمهندس - متنطقوهاش ارشتكت -
والأسيندت السوده مش بطالة لكن اللي حلوة قوي السول وبس كده في الرجالي الباقي ياما مشمتهوش او رحته مكانتش جذابة او حسيته هادي او مش قوي لأن زوجي بيطلع من الساعه 5 صباحا ومش بيرجع غير على النوم مقضي حياته في المواصلات وبيبقي عايز حاجه جامده
واكيد حنتكلم على البارفانات الحريمي عشان خطيبتك يكون لها نصيب ولا انتا بخيل؟؟؟؟؟؟؟؟؟؟

طيب يجي دلوقتي دوري انا الاول لو سمحتم هتكلم علي البرفانات عامه يعني ازاي ترش البرفان وايه اللي بيخليك مش تشمه واوقات انك تحطه فيها
نبدا ازاي ترش البرفان البرفان بيترش الاول لفوق يعني من تحت لفوق علي اماكن النبض وتبقي الازازه باصه لفوق علشان تدي للبرفان فرصه انه ينتشر ويتوسع وياخد اكبر قدر من المكان اللي هترشه عليه الاماكن المفضله خلف الكوع وخلف الاذن وعلي اسفل الرقبه وعلي الصدر وعلي خصلات الشعر ومش يحبذ انك ترش كتير علي الرقبه علشان مش يبقي في التهابات ويحبذ انك تاخد شور قبله علشان تفتح المسام وياريت كمان قبل النوع علشان تفتحها وتديها فرصه للانتعاش وانها تفرز العرق ومش تتحبس
الحاجه التانيه لما تستخدم الرفان يفضل انك تستخدم المجموعه كامله من مزيل العرق ويفضل الرش والافترشيف وياسلام لو ليه كمان شور جيل
الموضوع التاني ان البرفان انواع ومش كل البرفانات تقدر ترشها في واقت واحد يعني في برفانات تقيله انا مش بحبذها في الصيف مثلا زي سيجنتشر ودا راي شخصي وبفضل عنه السول وممكن الاسيدنت بيور بس مش جربتها البشمهندس مصطفي بيشكر فيها وزي كمان ألاوربان لوفيرز وزي الايكلات سبورت ويفضل استعمالهم بالنهار علشان هما اللي بيغيرو ريحة العرق مش العرق اللي بيغير ريحتهم اما عن بالليل فدا علي حسب المكان اللي هتروحوا يعني لو سهره خاصه يبقي الاسيدنت السودا ولو خروجه مع اصحابك تبقي الاس 8 نايت وفي حاجات بتمشي مع الليل والنهار ودا زي البلاتنيوم علي فكره ملحوظه صغيره ممكن الكلام دا مش يتوافق مع ناس تانيه دا رايي الشخصي علشان البرفان دا احساس وزوق وهما الاتنين بيختلفوا من شخص للتاني
دي المقدمه ويارب تكونوا مش زهقتوا مني اكمل ولا ايه اكمل واجري علي الله ولو مليتوا سامحوني
هبدا بالترتيب من الاحلي للاوحش وهعمل في الاعتبار اننا في فصل الصيف
اولا السول بجد تحفه ثبات محترم ريحه تهبل كل اللي شمها شكر فيها وتنفع للخروج بالنهار للذهاب للعمل
ثانيا ايكلات سبورت جامده كريحه جدا لدرجه ببقي مرووش وانا حاططها وبفضل اشم في نفسي وللي جنبي بيفضل يشم فيا وبعمل ازمة شم في المكتب وثباتها بالنسبالي 6 ساعات زي السول وقت العمل يعني
دول بالنهار
بالليل
لو خروجه اصدقاء عادي اولا s8 night ريحه ملهاش حل وثبات جامد
ثانيا الاسيدنت السودا لو سهره او فرح دبلوماسي راقي طبعا مش هتكلم علي ريحة الفانيليا اللي فيها تحفه وثباتها جامد
نيجي بقي للي ينفع بالليل والنهار ودي البلاتنيوم بحس فيها برستيج محصلش تحفه وجامد اوي
المره اللي جايه هتكلم علي البرفانات في الشتاء وعلي فكره ملحوظه انا جربت الحلاسير الزرقا ريحتها تحفه بس ثثباتها مش لذيذ خالص عايزه بجد راجل رياضي اخره ساعتين رياضه ويشوف غيرها
جربت الدي ماركوو ثبات حلو بس ريحه مش عجبتني
كدا اناطولت اوي واكييييييييييد زهقتوا مني سلام بقي

لا كلامك كويس
بالنسبة لحد مش فاهم في البرفانات الرجالي زيي
كمل

مصطفى خروب كتب:

بالنسبه للبرفانات الرجال
بصفه عامه بدون استثناء انا ما شوفتش برفان رجالى فى اوريفليم ريحته وحشه (على عكس الحريمى مثلا ليا ملاحظات على بعض الحاجات بس لما نيجى لوقتها) يعنى مممكن ما تحبش برفان بس ما تقدرش تقول عليه ريحته وحشه ولو حطيته ما تبقاش زهقان منه او مضايق مش عارف ده رايى واللى من رايى يقول واللى شايف ان فيه حاجه وحشه يقول

انا هبدا باكتر برفان بحبه

الاسيندنت بيور (البيضاء): بصراحه برفان اكتر من رائع وبحبه جدا جدا وهو اول برفان جبته من اوريفليم على فكره
انا بحس ان ريحته اهدى وارق ريحة برفان ممكن تشمها
كمان لاحظت حاجه غريبه لما جربت التست اللى كان نازل فى الكتالوج بتاع برفان بارادايس الحريمى حسيت انه شبه الاسيدنت بيور اوى بس على اهدى كمان
الازازة بتاعته شكلها شييييك جدا وهو صناعه فرنسا75 مل وثباته فوق المتوسط
وعلى فكرة انا ناوى ان شاء الله ده اللى هاحط منه يوم فرحى

s8الابيض: البرفان ده كنت مستغليه بالنسبه لحجمه 50مل بس جبته فى العرض بتاع شم النسيم ده وقولت مش هيخسر
بس أول ما جربته رحت جبت منه اتنين كمان
بجد برفان حكايه واسطورى كده وبحس بانه مختلف كده مالوش زى هو ريحته عامله زى بتاعه كده عاملة زى الجلى كولا بس بالعرقسوس ريحته قريبه من كده واخده منها شويه بس على احساس رائع مش عارف ليهfeky
ما حبتهاش
الازازة بتاعتها لوحدهاحته ديكور صناعته فرنسى عيبه الوحيد انه 50 مل بس ثباته الرهيب يعوض حجمه رشه واحده منه كفايه


معلش اناايدى تعبت من الكتابه هاكمل الباقى بعدشويه
ومستنى تعليقم على رأيى

بشمهندس حضرتك متاكد ان الs8 العاديه ريحتها حلوه وكمان ثابته طيب بتهفهف كدا زي الs8 night ولا لا يعني اللي جنبك بيشمها اصلي ناس كتير قالت انها مش ثابته وكمان انها خفيفه راي حضرتك ايه

dinaali كتب:

انا شخصيا عجبتني الأركتكت - على اسم مهنتك يا بشمهندس - متنطقوهاش ارشتكت -
والأسيندت السوده مش بطالة لكن اللي حلوة قوي السول وبس كده في الرجالي الباقي ياما مشمتهوش او رحته مكانتش جذابة او حسيته هادي او مش قوي لأن زوجي بيطلع من الساعه 5 صباحا ومش بيرجع غير على النوم مقضي حياته في المواصلات وبيبقي عايز حاجه جامده
واكيد حنتكلم على البارفانات الحريمي عشان خطيبتك يكون لها نصيب ولا انتا بخيل؟؟؟؟؟؟؟؟؟؟

دينا معلش هتعبك انا طبيعة شغلي زي جوزك بالظبط ربنا يخلهولك ممكن تساعديني بجد قوليلي ايه الرفانات اللي بيرشها من 5 الصبح وبتشميها فيه لما يرجع بالسلامه اخر النهار علشان انا بجد بحتار كلهم حلوين بس عايز استقر علي كام واحد كدا ويكونوا هما الخلاصه من ناحية الانتشار والثبات وميرسي ليكي اوي وز

انا جربت برفانات حريمى جوردانى جولد حلوة اوى ومميزة وجوردانى وايت ريحتة رهيبة تحفة ومختلفة عن اى برفان تانى
البرفانات الرجالى اشتريت منها كتير لزوجى والافضل بالترتيب:
1_ فلامبوينت بيحبها موت وخصوصآ لما لقى شعارها محفور على العلبة من جوة فقال دى حاجة محترمة اوى
2_الاركتيكت تحفة
3_الجوردانى البنى دى للخروجات الشيك
4_الاسيندنت السودا انا شخصيآ بموت فيها حلوة اوووووووووووووى
5_الديماركو شغالة
6_الجلاسير الزرقا عجبت زوجى اوى بس خفيفة شوية
وطبعآ الافتر شيف جوردانى جولد وجلاسير وs8نايت حلوين
بس مزيلات العرق مش حلوة ومعجبتش زوجى علشان بتعمل ابيض فى الهدوم وهو بيفضل الاسبريهات عليها

احم بص يا مصطفي هو البارفانات اللي بتتكلم عنها دي مش موجوده للأسف في اوريفليم او على الأقل مش من الحاجات اللي جبناها -ودي قليلة جدا - لكن انا عندي واحده صاحبتي جوزها كان بيحط السول - ايام ما كانت بتنزل ب 60طبعا - وكانت بتثبت معاه وهو كان بيطلع من 5ص ومبيرجعش برضه غير على النوم وكانت بتشمها في هدومة كمان
اتمني اني اكون افدتك لأن زي مانتا عارف البارفانات في اوريفليم غالية شويتين فالحاجات اللي جبناها يا اما كانت هدايا من الشركة على النقط زي الجلاسير او هدايا في مناسبات -انا جايباله الأركتكت الشهر اللي فات عشان عيد ميلاده او عيد جوازنا على حشب الظروف بس هو لسه ميعرفش

علي العموم كل سنه وانتم طيبين وربنا يخليكم لبعض ومتخافيش سرك في بييييييير

انا عن نفسي مفيش حاجه مش بحبها في اوريفليم كلهم ريحتهم حلوه بس نفسي استقر علي حاجه يعني مثلا انا جبت لغاية دلوقتي السيجنتشر والسول والاسيندنت السودا والديماركو وكمان الاس 8 النايت والبلاتنيوم والايكلا السبورت ويمكن اكتر اتنين عجبتني ريحتهم اوي هما اخر اتنين وبحتار احط من انهي واحده كل ما اخرج ولسه عايز اجرب الاكتيكت والايكون شميت التستر بتاعها تحفه وكمان الجورداني الخضرا ناس كتير بتشكر فيها وعايز اجيب الاربان لوفيرز زكمان نفسي اجيب الاس 8 العاديه علشان اجربها شفتي بقي هو الحل اني الاقي عروسه اخطبها واللي هي تحبه اجيبه وهي تختارلي يالا بقي دورولي علي عروسه بدال ما تجنن بسبب البيرفم انا بجد بموت في ريحة البيرفم اوي

ساعات لما باكون باستخدم غسول وخاصة للبشرة الدهنية واسيبة واغسل بالصابون ولو لمرة واحدة الاقى وشى بعد ما كان دهنى بقا جاف بطريقة بشعة
او لو غيرت من غسول لغسول
ولا بينفع ف الحالة دى اى كريم ترطيب
وبيكون شكلى ولا المحروقة
كنت عايزة بجد اكلم حد من الشركة ع الموضوع دة
دا تفاعل منتجات ولا ايية بالضبط

ياجماعه ركزوا احنا في البرفانات الرجالي