مش لاقيه اسم للموضوع ادخلوا واحكموا

الحمد لله على عدم قلقكم على غيابي الفترة اللي فاتت
لكن - من غير هزار- بجد اصحاب القلوب الضعيفة ميقروش الموضوع
انا من يوم الأتنين وانا بحاول اتمالك اعصابي ومش قادرة النهارد يدوب عرفت اسيطر على ايدي واقعد اكتب لكم انا حصل لي ايه عشان مليش حد -بعد ربنا - غيركم


الحكاية ابتدت يوم الأتنين اللي فات الساعه 12الا ربع قبل منتصف الليل
دخلت انا وانس السرير وكان يا حبيبي خلاص حينام فوجئت بجارتي -الباب في وش الباب بتصرخ بس مميزتش كلامها افتكرتها عادي بتنده على حد من اولادها او عندهم خناقة ولا حاجه دقيقة وكان الباب بتاعها مهبود هبده فظيعه لدرجه اني حسيت ان بترج على السرير
قلت انا لازم اكلمها الصبح على الموضوع ده الولد كان خلاص حينام اتفجع وصحي
دقيقة تانية ولقيت جارتي اللي تحتي طالعين في البلكونه وعمالين زي مايكونوا بيتكلموا بس بعصبيه وصوت عالي
قلت مش عوايدهم العمارة عندنا محترمة ومش بتاعه الصريخ في البلكونات او الصويت والحاجات دي
اعذروني انا بترعش دلوقتي وانا بفتكر

جوزي صحي وقاللي فيه ايه دي خناقه ولا جارنا وقع تاني-جارنا اللي تحت كان جاتلة دوار من كام اسبوع وطلبوله الأسعاف-
قلت له مش عارفة شوية ولقيتهم تحت بيصواتوا احنا بنموت الحقونا
ولقيت عندي دخان شبه لما يكون حد مدخن سيخارة واخد نفس واحد منها
ولقيت جارتي بتتصل من موبايل جوزها - اللي قدامي-وجوزها بيقوللي فيه منفذ في شقتك نقدر نعدي منه
انا مفهمتش كل اللي فهمته ان في حاجة حصلت في الجنب التاني وعايزين يجيوا عندنا قلتله بدون تفكير تعالوا اتفضلوا
وقلت لجوزي افتح الباب
المسافة بين سقتي لشقه اللي قدامنا جوالي متر متر ونص والعمارة كلها حاطة نيون على كل بسطة عشا الأضاءة تكون حلوة لأن الشارع ضلمة من كتر العماير اللي طلعت وخاصه بعد الثورة وانتم بتسمعوا في القنوات عن الفوضي عندنا في اسكندرية
انا بقول كده عشان اما اوصف لكم اللي جاي تتخيلوا معايا
اول ما جوزي فتح الباب لقيت بدل النيون والضوء بتاعه
عارفين التليفزيون وهو مطفي عارفين العتمه دي اهو انا لقيت بره الشقه كده
وهما مش شايفننا مسكت التليفون وزعقت احنا فاتحين الباب تعالوا ومراته تقولله انا مش شايفة حاجة حنوص ازاي عند سارة يقوللها حسسي على الجدار وامشي يللا بسرعه
دخلوا الشقة واتجهوا لأخرها خالص
عندي البلكونه اللي في اخر الشقة احنا سادين نصها لأنها قايلة للسقوط
المهم فتح الشباك اللي بيطل على البلكونه وقال لأولاده نطوا جوه ونط هو وقعد يدور على منفذ يطلعه على سطح قريب
عمارتنا ملهاش سطح وبنطلعله من البلكونات واقرب سطح بعيد عننا بمسافة مترين الا
وجيراننا اللي تحت يصرخوا في النجده ابعتولنا المطافي والأسعاف يا ناس الحقونا احنا بنموت
انا كنت الدور الأخير واخر شقة دخلها الدخان
جريت على التليفون وكلمت ماما الللي ساكنه في الدور التاني في نفس العمارة وقلتلها في ايه
قالتلي متقلقيش ومتخافيش احنا كويسين الودل عامل ايه
طبعا مش عارفة اوصف لكم حالة كان عامل ازاي عياط وصريخ واحنا بنحاول نطلعه البلكونه عشان ميشمش الدخان الفظيع الأسود اللي ملا الشقة عندي واحنا عمالين نكح وننزل السودا من الأنف لما نكح ننزل اسود من صدورنا والفوط المبلولة في ايدناو ومفيش حاجة نافعه انها توقف اللدخان عشان منشمهوش
فين وفين على ما جه المطافي اتشاهدنا قلنا على الأقل مش حنموت بالنار
لما المطافي جت اتاخروا ومنزلناش غير بعد واحدة لاحظوا ان بقالنا اكتر من ساعه فوق وهما مش عارفين يوصلوا لنا لأن الدخان اتركز فوق وملقاش حته ينفذ منه لأن مفيش سطح زي ما قلت لكم
صدقوني يا بنات انا مش بحكي فيلم والله ده اللي حصل لي فعلا الأتنين اللي فات
جيراننا اللي تحت يصرخوا احنا فوق اطلعولنا انقذونا احنا معانا اطفال احنا بنموت حرام عليكم حد ينزلنا
هنا وقلنا اننا حنموت بالخنقه من الدخان كان كل همنا اننا ننزل العيال وبس اولاد جارتي وابني اتشاهدنا 100 مرة وطلبنا رحمة وربنا
اول مرة اعرف معني دعاء -اللهم ارفع غضبك ومقتك عنا- اول مرة احس بغضب ربنا شكلة عامل ازاي
اكلم ماما مش بترد قلت خلاص يبقي نزلوهم وسامعه ناس طالعين بينزلوا السكان وعمالين يخبطوا على البيبان
اول ما ماما نزلت تحت قعدت تصرخ فيهم بنتي نزلوا لي بنتي بنتي فوق ومعاها عيل صغير
وجارتي اللي تحتي على طول نزلت لطمت لهم العيال اللي في الدور اللي فوقي حد يطلع يجبهم حيموتوا حيتخنقوا
فين على ماجم نزلت انس ومعاه جارتي ونزلت بعدهم بعد ما حطيت حاجة على راسي نزلت وانا مش عارفة حرجع تاني لبيتي ولا لأ
مخدتش معايا حتي ربع جنية بطاقتي الشخصيه كل اللي اخدته الموبايل ومفتاح الشقة
نزلت معاهم وانا مش عارفة لحد ساعتها ايه اللي حصل بالظبط ناس تقول تحت وناس تقول عند جاره لينا ماس في التكييف
حاجات كتير متضاربة
نزلت لقيت عمارتنا اخر دورين من تحت -الأرضي واول دور ودور ماما لونهم اسود -عمارتنا كلها مدهونه ابيض بقت اسود ولقيت اول شقة تحت خالص في الجنب اللي قدامي محروقة بالكامل كانت مخزن فيه دقيق ومستلزمات عمل الحلويات وكان فيها عمال بيباتوا ولقيت مدخل العمارة غرقان ماء اسود
ادور على امي او بابا او انس او جارتي مش موجودين طلعت بره العمارة ومشيت حبة في الشارع كلها وشوش معرفهاش فيييييييييييييين لما لقيت جيراننا نازلين كلهم بهدوم النوم ولقيت جارتي اخدت بايدي وقبل ما اسالها شاورت لي انس اهو قاعد مع مامتك
مش عارفه اوصف لكم على الليله اللي قضيناها في العربية بتاعه ماما في الشارع في السقعه ولا جارتنا اللي نزلت لأنس رغيف فينو ياكلة ولا على العروض
يا جماعه اطلعوا قضوا الليله عندنا -اتفضلوا طيب لحد ما يطمنوا على العمارة
فييييين على الفجر طلعنا
انس كان نازل بالموبايل اللعبة بتاعه كان ماسك فيه ومش راضي يسيبة من ايده وقعد في العربية مع ماما يلعب ويغني غنا الأطفال للي متفهمهوش لكن كان حاسس انه في امان
طلعنا الشقق تاني يوم لقينا كل حاجة سوده كلة عايز يتغسل العممارة كلها عايزة خرطوم ماء كبير عشان يغسلها ويغلنا معاها يغسل همومنا ومخاوفنا وعقدتنا من اننا كنا حنفقد السقف اللي لاممنا تحته اول مرة احس بمعني البيت انا عارفاه لكن اول مرة احسه والسؤال في بالي حنروح فين لو قالولنا مفيش عمارة حنروح فين
حنعمل ايه
العمارة كلها غسلت تاني يوم انا بقالي كام يوم بغسل وانضف
الدور الأول الشقة اللي فوق المحروقه على طول كان فيها راجل وست عواجيز ومرضي كانوا جايين يقبضوا المعاش وبيباتوا الليلة عند ابنهم وهو عنده 3اطفال صغر اكبرهم 5سنوات واصغرهم شهرين مراته كانت بتصرخ طلعوا عيالي انقذوهم
انا مش قادرة اكتب اكتر من كده مش قادرة

انا عيطت ودموعى نزلت من كلامك يادينا مع انى لسة مش فاهمة ايه الى حصل وسببه ايه
بس حمد لله ع سلامتك انتى وانس وبابا انس ومامتك
الحمد لله انكم بخير

انا كنت هسال عليكى والله يا دندون بس قلت انك مشغولة مع انس ولا حاجة دلوقتى انا ركبى سابت بامانة لدرجة مش عارفة اركب الكلام اللى انتى كاتباه على بعض طمنينى يا حبيبتى خيييييير شقتكم جرالها اية ف الحريقة دى كلها?????

انا بشكركم جدا على شعوركم ده ايمان وماريان اللي حصل ان شقة في الدور الأرضي ولعت بكل ما فيها وكان فيها بلاستيك ودقيق عشان دي مخزن وكانت السبب ان العمارة كلها كانت حتولع والدخان الأسوده كلة ملئ العمارة وكنا حنموت الحمد لله اننا متخنقناش ونزلنا سلام كمان الحمد لله الن مفيش شقق طالتها النيران مفيش بس غير واحد راجل طيب كان ارزقي على باب الله من اللي يشوفوكي يشيلك شنطة ويوصلهالك ويغطي عربيه ويجيبلك حاجة من السوق يعني وكان بيفرح بالجنية قبل العشرة ده اتخنق جامد كانوا مطلعينه من الشقة لأنه كان بيطفي معاهم وراح المستشفي على طول وبيقولوا لسه تعبان ربنا يستر عليه لأنه راجل طيب جدا
المشكلة كانت اننا قلنا احنا حنموت حنموت بو ممتناش من النار حنموت لو العمارة وقعت او الدخان اللي مش لاقيين حته يتصرف فيها يعني كلنا قلنا احنا ميتيم بس مش عارفين حنموت باي طريقة وده هزنا جدا اننا قربنا جدا من موتنا

حمد لله ع سلامتكم يادينا

الف بعد الشر حمدالله على سلامتكم يا دندونة ما تقوليش موت تانى خالص لو سمحتى ربنا سترها عليكى عشان انتى بنت حلال واللى اتوسخ يتغسل على مهله الف حمد وشكر انها جت على قد كدة وانا عارفة انها خضة جامدة بس هتهدوا ا ش ا وتنسوها مع الوقت ربنا يديكم سكينة وامان ويستر عليكم يا حبيبتى

دينا والله العظيم انا قاعده برتعش وعيني بتدمع وضغطي وطي جدااااااا
حبيبة قلبي الف حمد الله علي سلامتك ماتشوفي شر ابدا
المؤمن دائما مصاب
هدي نفسك وصلي كتير وادعي ربنا يربط علي قلبك ويخفف الصدمه دي وينسيهالك
ربنا كبير اوي يادينا مفيش أحن منه ولا اكرم منه ياحبيبتي
قلبي معاكي

حمدلله على سلامتك يا دينا انا فعلا حاسه انى بحلم مش مصدقه كل ده حصل ولا احنا هنا ولا حسينا بيكى معلشى يا حبيبتى المومن دايما مصاب والحمد لله انها جت على اد كدة الحمد لله احمدى ربنا كتير وادعى ربنا كتير والف حمد لله على سلامتك وسلامه العائله يا ام انس

لا اله الا الله ولاحول ولاقوة الا بالله العلى العظيم
انا مش عارفة قولك ايه الله يكون فعونكم جميعا
ربنا يربط على قلوبكم ويهدئ من روعكم
"اللهم لاتحملنا مالا طاقة لنا به واعفو عنا واغفر لنا وارحمنا"
حمدا لله على سلامتكم يادينا يا حببتى
اكيد الامر دا له حكمة واكيد المكسب الكبير اللى هتغتنميه من وراه القرب اكتر من ربنا لان دايما الشدائد بتفوقنا لكن دايما بردو ندعى بالدعاء السابق لاننا ضعفاء والابتلاءات كثيرة وشديدة
"اللهم لاتحملنا مالا طاقة لنا به واعفو عنا واغفر لنا وارحمنا"
ان شاء الله ربنا يشد من أزرك وتخرجى من الشدة دى على خير واقوى من الاول
وربنا مايصيبكم جميعا بمكروه يا بنات

ساندي ارجوكي متحسسينيش بالذنب اعملي معروف ومتخلينيش اندم اني حكيت يعلم ربنا انا كنت متردده كام يوم -بس حملة الغسيل اللي بتمر بيها العمارة هي كانت منعاني -اني احكي وكمان قلقكم وخوفكم على كمان ربنا ميحرمنيش منكم
ساندي ارجوكي ضبطي حالك انتي داخلة على عملية مهمه وكبيرة
انا بجد يا جماعه اتهزيت من الردود دي والله ربنا يباركلي فيكم وميسمعنيش عنكم اي مكروة
فعلا اول حاجة عملناها كلنا اننا صلينا شكر لربنا على انه نجانا لأن اللي كان يشوف الموقف يقول اننا هالكين
الحمد لله على اننا كلنا كويسين ومش لاقية كلام اوصف شعوري وانا حاسة انكم كلكم جنبي وقاعدين معايا دلوقتي في الأوضه

الف سلامه عليكى يا دينا يا حبيتى انا والله لسه داخله النهارده نت وزعلتينى اوى بجد عليكى بس احمدى ربنا يا ينا وحمدلله ع سلامتك وسلامه انس احمدى ربنا وطلعى حاجه لله انكم بسلامه وبخير يا دودو ومعلش متزعليش منى انى مسالتش عليكى لانى لسه فاتحه النهارده والله بقالى 10 ايام موش بفتح وشغلى القران دايما ف بيتك يا دودو وحاولى تهدى اعصابك ومتفكريش ف الموضوع ده عشان اعصابك متتعبش وتعرفى تنامى وع البيت يا ستى ع مهلك وحده وحده وهيرجع فله انشاء الله واحسن من الله حمد لله ع سلامتكم والحمد لله انها جت ع قد كده

حمدا لله على سلامتك واهلك وسكان العمارة وربنا يشفى العم العجوز المصاب وربنا سبحانه وتعالى دايما فى قضائه رحمة قدر ولطف بجد

الحمد لله على سلامتك وعلى سلامه انس ربنا يخلهوللك

قدر و لطف يا دينا الواحد لما بيشوف الي بيحصل حوليه يلقينا عايشين بس بستر ربنا
الحمد لله علي كل حال و انا بقرا كلامك مش عارفه ليه افتكرت الشباب الي مات في التحرير و محمد محمود الي كانوا بيروحوا للغاز و الدخان برجليهم و يمشوا جواه بجد ابطال

حبيبتي الف حمدالله علي سلامتك انتي وجوزك وانس والحمد لله انكم بخير بس احمدي ربك لان ده اكيد كان اختبار من رب العالمين علشان بس نعرف اننا في الاخر ملناش الا رب العزه والحمد لله انكم بالف خير

لا حول ولا قوة الا بالله

ايه كل ده معلش ربنا عداها علي خير حاولي تنسي ال حصل مع انه مستحيل يتنسي بس حاولي متفكريش كتير والله انا اتضايقت جدا وماتصدمت وحسة بيكي اوي

مش هقدر اقولك غير قولي الحمد الله والف حمد الله علي سلامتك وعلي سلامة انس

لا اله الا الله والله اليوم كله اتقفل واحنا الفجر وعنيا دمعت
بس الف الحمد لله على سلامتك انتى وابنك وكل اهل بيتك والله كل يوم على بالى بس فكرت ان مفيش حاجه وقولت اكيد مشغوله مع انس او النت فاصل وقدر الله وماشاء فعل وكل شيء بيحصل بسبب ساعات من حب ربنا لينا يخلينا نشوف الموت بعنينا ويقربنا منه عشان ايماننا يزيد اكتر واكتر الحمد لله انها عدت على خير رغم انها كانت ليله من اصعب الليالى اللى مرت عليكى اكيد واحساس الواحد انه مش راجع بيته تانى ربنا ما يحرمك من بيتك ولا يحرم اى حد مننا كلنا من بيته بس هل السبب فعلا ماس التكييف ولا ايه

لا اله الا الله
انا كنت قلقانه عليكى وقولت اكيد مشغوله فى حاجه .............
انا مش عارفه اقولك ايه الحمد لله .....وحمدلله على سلامتك انتى وانس ...ربنا يصبرك ويعينك واكيد ربنا ليه حكمه من اللى حصل أ ش ا خير
خلى بالك من نفسك يادودو انتى غاليه علينا قوى

الف حمد اللله على سلامتك وسلامة انس وربنا ينجيكى من كل شر يارب
ومتزعليش انا مساللتش عليكى لان عندى ظروف اليومين دول ومش فاضية مش بدخل كتير
والحمد للة انك بخير انتى وابنك واى حاجة تانية مش مهم

الف حمدالله ع سلامتك انا مش مستوعبه اللى بتحكيه بس الحمدلله انكو كويسين انا مش بدخل كتير عشان الشغل بس بجد دايقتينى عليكى موت الحمدلله على كل حال المؤمن مصاب ياحبيبتى

انا بقالى يومين مفتحتش بس لاحظت غيابك طبعا قبلهم وقلت يمكن مشغولة وكنا حنخدك غياب انت كنت حتخلينى اعيط بجد لانى بقالى كم يوم بفكر فى الموت كتير اوى
وبعدين احنا حصل لنا السنة اللى فاتت حريق فى شقتنا فانا متصورة الوضع عندك ازاى بتكون صدمة بتخلى الانسان يفكر فى نعم كتير ربنا مديهالو وهو مش حاسسها
بيفكر انة ممكن يموت فى لحظة او يفقد حد غالى علية اويفقد بيتة ومعاة كل حاجة يملكها فى الدنيا
بس ديما بيقولوا افتكار ورحمة لان ربنا بيصحينا عشان نقرب منة بعد منكون بعدنا شوية وندعوة ونقربلة
حمد للة على سلامتك انت وانس وبابا انس ومامتك وربنا يبعد عنكم الشر

معلش يا جماعه والله كل ما دخل امبارح تحصل حاجة الأول انس صحي
وبعدين حصلت مشاكل عندنا الصنايعيه كل ما يكسروا في الشقة الل اتحرقت يخربوا حاجه
كسروا ماسورة ماء وقعدنا من غير ماء فترة على ما صلحواها
وبعدين عداد الكهرباء فرقع وضرب عشان واخدين منه وصلة والنور كان حيطفئ
ونزلت جبت حاجات لبيتي لأن كل حاجه تقريبا طالها الهباب الأسود ومقدرناش ناكلها واترمت
انا متشكرة بجد على دعواتكم وربنا ميسمعنيش عنكم حاجة وحشه ابدا
رورا واسراء كنتم حتاخدوني غياب للأبد !!!!!!!!!!!!!!!!!!!!!!
فعلا يا اسراء افظع حاجة هي النار
انا مش عارفه انام لحد دلوقتي كل شوية اقوم مفزوعه او اتخيل ان الشقه فيها دخان او اني شامه ريحه الدخان
جارتنا اللي تحت وهي بنوته عدت العشرين بتخاف تنام وحدها بتنام مع باباها ومامتها

ربنا يسلم طريقنا كلنا يا بنات بجد واقدر افوق من اللي حصل ده وحقيقي الصديق بيبان في الضيق

الف الف الف سلامة يا قمر و الحمد لله على سلامتكم
ربنا يحفظكم كلكم و يبعد عنكم كل شر
انا اتصدمت من القصة و الحمد لله انها جت على كدة و كلكو بخير

الحمد لله على كل حال واي حاجة من ربنا كويسة اهو درس كمان محدش يسكن في عمارة فيها مخازن حيقطعوا الميه دلوقتي وعمال اشيل في ازايز ميه عشان مش عارفين حيقطعوها لحد امتي ربنا يصبرنا على كل حال

الف سلامه عليكى يا دينا وع انس وكل عيلتك
والله وانا بقرا الموضوع مكنتش مصدقه الواحد لما بيسمع قصه زى دى بتكون فيلم او حد بعيد عنه.... لكن لما تحصل لحد قريب منك كده وانا اقصدك انتو كلكم هنا بحسبكم اخواتى وربنا يعلم
انا بجد بترعش واول حاجه عملتها انى جبت ابنى وحضنته اوى كتر الف خيرك يا دينا انك مريتى بموقف زى ده مع لبنك انا والله وانتى بتحكى شايفه نفسى وابنى ف الموقف ده بجد انا بعيط ومش قادرة اكمل
حمدلله ع سلامتكم كلكم وربنا يبعد عننا كل سوء ويرحمنا برحمته