انا و خطيبي اتفارقنا ادخلوا ادعولي

السلام عليكم
النهاردة للاسف اكتشفت ان خطيبي كان شخص لا يستحق حبي ليه
بعد ما سبت بلدي و جيت هنا علشانه بس
المشكلة ابتدت لما رحناله مبارح انا و امي و اختي كان عازمنا
و امي استعجلته في موضوع الزواج وهو غير الموضوع
و لما كنا رايحين قال انه عايز يتكلم معايا على انفراد
و قلي بصراحة انا بشوف مستقبلي برا و عايز اتجوز من وحدة اجنبية
و انا كنت بحبك لكن دلوقتي لا بصراحة سالته ايه للي غيرك و ليه مقلتليش قبل كده
قلي مكنتش عايز اجرحك و عايز نبقا اصدقاء و دلوقتي ارجوكي انسيني تماما
خرجت عند ماما و اختي و قلتلهم يلا نروح
خرجت منهارة كليا ووقعت من طولي ودوني المستشفى ادوني حقن مهدئة
اتصلت عليه ماما قالتله يكلمني و يشرحلي عشان منصدمش و يجيني اكتئاب قالها هيكلمني الساعة 9 بالليل
كنت مستنية الساعة 9 جات 10 و لسا مكلمنيش بعتله مسج انه يكلمني
بعتلي مسج قالي انه خلاص مافيش داعي يكلمني و للي كان عنده قاله
بس تصدقوا اني دلوقتي مرتاحة مكنتش بتصور حياتي من غيره
لكن واضح اوي ان ربنا بعدني عنه لان لو كان ليا معاه خير كنا كلمنا مع بعض
بعتله مسج انه حسبي الله و نعم الوكيل و ربنا هياخد بتاري منه قلي الحب مش بالعافية مش عايزك خلاص
صدمني اوي و جرحني جدا اتغير 180 درجة كان بيعاملني زي الاميرة دلوقتي ؟؟؟
على الاقل كان يقدر حبي ليه و تضحيتي عشانه للي اي راجل يتمناها
دلوقتي قبل مكتب لكم الموضوع دخلت على الفيسبوك بتاعه عشان كان عندي رقمه السري
لقيته بيكلم اجنبيات و عايز يتعرف عليهم
دلوقتي مش عارفة اعمل ايه اصلا مصدومة عشان فرحي كان شهر 4
و كنت بجهزله و بشتغل و بلم المصروف عشان اشتري حاجات و افرح بيها
و افرح ماما و اختي وبابا
بس الظاهر ملياش نصيب ادعولي يا بنات ربنا يرزقني بالزوج الصالح للي ينسيني ده

ربنا يصبرك يا سارة ويربط على قلبك
معلش يا حبيبتى كدا احسنلك وانتى نفسك عارفة كدا
كويس ان دة حصل دلوقتى قبل الجواز والا كانت هتبقى الصدمة اكبر
انا عارفة انك بنيتى احلامك وتصوراتك لحياتك معاه اى واحدة مكانك كدا
بس محدش يعرف الخير فين
واكيد مكتوبلك بنى ادم يقدر حبك وقلبك الغالى دة
وخلى الاجنبيات ينفعوه مش قصدى انهم وحشين بالعكس فيه منهم كويسين بس هو ظلمك جامد ودة اكيد هيتردله
ادعى ربنا كتير يا سارة وقربى منه اوى واكيد هيفرجها من عنده

والله يا ساره انى اتضايقت جدا واليوم اتقفل بالنسبالى الله يكون ف عونك يا حبيبتى وكمان مش لازم تتضايقي ابدا والله لازم تفرحى وربنا عمره ما بيظلم حد وانتى ربنا هيعوضك بواحد احسن منه مليون مره وهو ربنا هيديله وحده هيقول فينك يا ساره وهياخد من جزاء عمله لان ربنا قال الطيبون للطيبات وده معناه انه مش ليكى ..ولازم تبقي عارفه انه واحد بالعقليه دى الحمد لله انها جت منه ولو رجعلك وده اكيد هيحصل انتى اللى ترفضيه المره دى وانتى غلطتى يا حبيبتى انك بينتى له انك ضعيفه من النهارده اضحكى وانبسطى وبينى انك من غيره احسن من ما كنتى معاه

واتاكدى ان بعد العسر يسر باذن الله

لا إله إلا الله الحليم الكريم، لا إله إلا الله العلي العطيم، لا إله إلا الله رب السموات السبع رب العرش العطيم

قولي الدعاء ده دايما ياحبيبتي


ماأصاب
عبداُ هم ولاحزن فقال : اللهم إني عبدك ابن عبدك ابن أمتك ناصيتي بيدك
ماضِ في حكمك ، عدل في قضاؤك أسالك بكل اسم هو لك سميت به نفسك أو أنزلته
في كتابك ، أو علمته أحداً من خلقك أو استأثرت به في علم الغيب عندك أن
تجعل القرآن العظيم ربيع قلبي ، ونور صدري وجلاء حزني وذهاب همي " . إلا
أذهب الله حزنه وهمه وأبدله مكانه فرحاً

رواه أحمد وصححه الألباني.الكلم الطيب ص74

كل شئ فى حياتنا نصيب انا حصلى زى القصة دى بظبط لما كنت فى سنك والحمد لله كنت بصلى كتير وادعى ان ربنا يهدينى وينزل على قلبى السكينة وان ربنا يرزقنى الرضا بالقضاء والقدر وكنت بقعد بليل اكلم ربنا واشكيلوا وسبحان الله كنت برتاح اكتر من انى اشكى لوحده صحبتى .. وفعلا مرت الايام وكنت تعبانة فى الاول بس الحمد لله ربنا عوضنى فى حاجات تانيه فى دراستى واصحابى ....بجد ياسارة ربنا اكيد هيعوضك فى حاجه تانيه وبعد فتره خطيبى كان عايز يرجعلى وفضل يحاول 6 سنين لحد ما قولتلوا انت لو اخر واحد فى الدنيا مش هتجوزك

ان شاء الله ربنا هيعوضك وخلى دايما فى بالك انو جرحك وانو مقدرش يعنى لازم تفتكرى الوحش علشان لو فضلتى تفتكرى الايام الحلوة يبقى مش هتعرفى تنسيه

واتأكدى انو حصل كده دلوقتى علشان ربنا بيحبك وعايزلك شخص احسن يصونك ولو كنتى كملتى مع الشخص ده كان ممكن يبيعك وانتو متجوزين

وقولى دايما: اللهم اجرنى فى مصيبتى وأخلفنى خيرا منها

ان لله وان أليه راجعون

حسبى الله ونعم الوكيل

وفى دعاء ظلم العدو بس مش فكراه دلوقتى هدور عليه واكتبهولك

وربنا يكرمك ياساره بالخير ويفرج همك وينزل على قلبك السكينة ويرزقك بالرضا بالقضاء والقدر

البنات هنا وفوا الكلام والنصح انا قلبي معاكي وانتي عارفه لو احتجتي انك تتكلمي احنا كلنا اخواتك وحنسمع لك وحتلاقي قلوبنا كلها معاكي مش مواساه من نوع الطبطبه وانا فرحانه جدا عشان انتي اخترتي انك تتكلمي عن مشكلتك مش تكبتيها جواكي لغاية ما تطقي ويجيلك اكتئاب بعد الشر كمان مبسوطة لكلامك ده:

سـآرة كتب:

بس تصدقوا اني دلوقتي مرتاحة مكنتش بتصور حياتي من غيره
لكن واضح اوي ان ربنا بعدني عنه لان لو كان ليا معاه خير كنا كلمنا مع بعض

هو ده فعلا اللي لازم تفكري فيه
فكري كمان انه خدمك من غير ما يحس دخلتي في تجربة واتعلمتي انك متسلميش قلبك لحد تاني بسهولة وانك تاخدي بالك -انا مش حقولك ان الرجالة كلهم خاينين والكلام ده لأ- بس ساعات ربنا بيدينا اشارات بسيطة بنعرف بيها معدن البني ادم اللي بنتعامل معاه
وهو خدمك في انه وداكي هناك في المغرب ممكن يكون هناك شغلك وحالك افضل من ماكنتي حتكوني هنا في مصر واديكي شايفة حال البلد من غير كلام كتير
بصي لنفسك ولمستقبلك وحاولي تنجحي -مش كلام طبطة والله- بس ده اللي لازم تعمليه عيشي بجد يا سارة
هي دي نصيحتي
عيشي

قدر الله و ما شاء فعل
احمدي ربنا انه بان من دلوقت بدل ما يبان بعد الجواز
و ربنا يرزقك بالزوج الصالح و يعوضك خير باذن الله

ربنا معاكى ياسارة كل شىء فى حياتنا قسمة ونصيب بس انتى والله ربنا بيحبك ان الى حصل دة حصل قبل الجواز سيبك من واحد ميستاهلش حتى انك تفتكريه وعيشى حياتك زى مادينا قالت انتى لسة صغيرة والحياة لسة قدامك وربنا ان شاء الله هيرزقك بالاحسن منه والى يستاهلك باذن الله

انا كنت مقرر انى مش هكتب مشاركات فى المنتدى وانى هتابع بس من يوم ما اصحابى اتطردوا منه بس لما شوفت الموضوع مقدرتش امسك اعصابى و احب اقلك كلمة واحدة الراجل اللى زى ده ميستاهلش ولا دمعة و اللى حصل ده اكيد فى مصلحتك و هو اللى هيندم اشد الندم

يا حبيبتي يا سارة
ربنا يعوضك يا حبيبتي ويرزقك بواحد يقدرك ويحبك ويشيلك في عينه
متزعليش لإن البني ادم ده ميستاهلش زعلك
ربنا بيخلق كل إنسان وله نصف تاني وإن شاء الله ربنا هيجمعك بنصك التاني قريب
وخوديها كلمة مني عن ثقة بكره هيندم ندم عمره وهيعيش بالذنب ده طول حياته إنه جرح قلب إنسانة حبته
وخليكي فاكرة إن إنتي الكسبانة

ربنا يكرمك ويرزقك باللي أحسن منه إن شاء الله ،اللي زي ده بجد خسارة تضيعي من وقتك تفكري فيه ولا تزعلي عليه أصلاً لأنه ميستاهلش، ربنا مبيعملش لحد حاجة وحشة يا سارة خليكي متأكدة من ده.

متزعليش يا سارة وان شاء الله ربنا هيديكى احسن منة دة انسان ميستهلكيش

الحمد للة ان ظهر على حقيقتة من دلوقتى مش بعد الجواز ولة كان فية اطفال كانت المشكلة حتبقى اكبر وعمر ماكانت الصلة حتنتهى ولا المشاكل
ادعى ربنا كتير يصبرك على قضاءة وتاكدى ان اللة سبحانة دائما بيعمل االلى فية الافضل للانسان
واحنا هنا كلنا معاك اتكلمى معانا وفضفضى

شكرا ليكو اوي انتو بجد اغلى اصحاب و احباب و الخير فيما اختاره الله انا كنت بجد بعدت عن طريق الايمان اووووي مبقتش زي ما كنت و عشان هو منفتح و مش بيصلي و عقليته زي الاجانب و كان مهووس ببرا و اثر فيا و الله اعلم لو اتجوزته كنت هبعد اكثر و اكثر و انا عارفة ان شاء الله انه هيندم اووي عشان مش هيلاقي وحدة تحبه زي ما كنت انا بحبه و هيندم لانه صعب اوي يلاقي وحدة صابرة عليه و جارية وراه و بتعامله حلو .. و ربنا يمهل ولا يهمل ، انتو خففتوا عليا اوي و ربنا يجازي كل للي رد عليا بالخير و يرزقكم الخير و جميع المسلمين آمييين و ادعوا معايا ربنا يهديني و يبعتلي الزوج الصالح عشان دعاء المسلم لاخيه المسلم عن ظهر غيب مستجابة

متزعليش يا ساره صدقينى انتى هتاخدى اللى احسن منه مليون مره ويحبك وميقدرش يشوفك دمعه من عيونك متقوليش غير حسبى الله ونعم الوكيل ومتفكريش فيه كل ما تحول تفكرى فيه افتكرى جرحه والوحش ليه وادعى ربنا انك تنسى بسرعه وف الاخر يا ساره كل شئ قسمه ونصيب وكل حد فينا مكتوب عند ربنا هو لمين ربنا يكرمك يارب بانسان صالح هو من الاول لو كان بيتقى ربنا كان هيتقى ربنا فيكى بس هو فكر ف مصلحته اولا واحمدى ربنا انو حصل قبليها بكم شهر فى بيحصل مواضيع ومشاكل ليله الفرح فانتى تحمدى ربنا وفكرى بس فى مستقبلك وصلى كتير وقربى من ربنا اكتر صدقينى هتكونى احسن وربنا يباركلك يارب ف حياتك ومتزعليش معلش عشان خاطرى ولا تحول تضيقى نفسك يا قمر لانى جت عليا فتره زيك كده والحمد لله اهى بتعدى وبحول انا فرحانه انك حكيتى لينا كلنا عشان احنا هنا اخواتك واصدقاءك وربنا يعوض عليكى بانسان كويس يخلصلك ويصونك ويتقى ربنا فيكى

سارة حبيبتي انتي حوارك ده بايظ و كان لازم ينتهي انا مش فاهمه ازاي اهلك يسبوكي تروحي نعيشي في المغرب لوحدك ده المفروض كان دفنوكي و لا انك تروحي تعيشي في الزقازيق لوحدك حب اية يا ماما الي بنت بتسيب بلدها عشانه و بعدين في حد يروح يشتغل في المغرب برضوا حرام عليكي يا شيخة سيبي الوظايف لصحاب البلد هيا المغرب نقصاكي عملاله بالظبط زي اللبنانين الي بييخوا يشتغلوا في مصر ما الخليخ قدمكوا تيجوا تقطعوا علينا لية
و بعدين انتي قولتي انك هناك من 5 سنين يعني من ونتي عيلة بالزمة ده شغل ناس عاقلين و كنتي قاليلة فرحك مش دلوقتي خالص لسه كام سنة مش عارفة غيرتي رائيك امتي بس؟
و اصلا اي حب يبتي قبل سن الرشد من حق اي طرف فيه ينهيه في اي وقت لانعه بيقا لعب عيال واي هبل
انا شفت واحدة مرة اتعلقت بواحد مسيحي واحنا في اولي ثانوي طبعا اي هبل واحدة و احنا في اعدادي صيدلة اتخطبت لواحد داخل حقوق بعد الدبلوم
اللوم مش عليه انتي دخلتي طريق كله حفر من الاول

براحة عليها يامارو.. خلى بالك هى مصدومة لسة من الى حصل المفروض تواسيها

مارو بس خيفه عليها وزعلانه : )

يارب يرزقك الزوج الصالح اللى يعوض بيه صبرك خير يا سارة وزى ما قولتلك بانى اقوى من الاول...ليا كمان جارتى متزوجه من 11 سنه وعندها 3 اولاد ومتزوجه عن قصه حب كمان وفجاءه جوزها طلقها لانه حب بنت من المغرب على النت ومسافر يتجوزها مش عارفه ايه هوس الاجنبيات المفاجىء ده

بصى يا ساره انا تقريبا اتعرضت لنفس موقفك كان زميلى فى الشغل وكنت صابره عليه سنه كامله عشان يعمل حاجه ويتقدملى وكانوا اهلى عارفين وكلم اخويا لكن للاسف انا وقفت جنبه كتييييييييييييييييييييييييير وجيت على نفسى عشانه كتييييييييييييييييييير كان برضه معيشنى وهم بحبك وانت كل حاجه فى حياتى بس اشترى الشقه واول ما اترقى فى شغله اتلكك لى ولاخويا وسابنى من غير اى سبب عارفه اخد سنه من عمرى وانا اصلا مش صغيره انا 29 دلوقتى بس هو انسان بلا ضمير كانت خطوبتى شهر 2 الشهر الى احنا فيه وبرضه قولتله حسبى الله ونعم الوكيل عاوزه اقولك فى اقل من اسبوع راحت منه الترقيه والشغل بتاعه نقله لفرع القاهره مع انه فى اسكندريه ومش هيشوف اهله غير مره كل شهر زى السجن وصدقينى هو لسه هيشوف كتير زى ما خطيبك هيشوف كتير انا برضه بيجيلى اوقات بعيط بس بحس ان ربنا بيحبنى لانه ببساطه معندهوش ضمير ومبيتقيش ربنا يعنى عمرى ماكنت هعيش معاه مستريحه اوعى تكلميه ابدا ولو رجعلك اوعى ترجعيله الكلام ده انا بقوله لنفسى لان الى باعك مره يبيعك مليون مره

اوعى تزعلى على واحد باعك ف لحظه ربنا كبير ويمهل ولا يهمل والحمدالله انها جات لحد كده ربنا بيحبك هيجيلك احسن منه بس خليكى قريبه من ربنا عشان ينصرك ويعرف ان الله حق ويندم ع اليوم اللى سابك فيه

بصي يا ساره انتي فكرتيني بقصة زي بتاعتك بالظبط بس على لسان الرجل
ساب مراته وهي معاها بنت وحامل ف التانيه يعني كانت في اشد الحاجه ليه وعشان سبب هايف برضو انه اتعرف على واحده تانيه
ولما فاق وتاب وندم حاول يرجعلها وهي رفضت تماما
فضل متعذب باقيت حياته حتى لما اتجوز واحده تانيه محترمه وكانت شيلاه في عينيها وقالتله من كتر ماهي شيفاه بيتعذب لو عايز ترجع لمراتك الاولانيه انا مش هزعل برضو كان عايش في جحيم وتانيب ضمير
هو مرض بالكانسر ومات ربنا يرحمه ويغفرله لانه تاب وندم على الي عمله
المهم افتكري دايما ان ربنا بينتصر للمظلوم ومتفكريش فالانسان ده تاني لانه جرك لتحت وكان هيدخلك في طريق المهالك والبعد عن ربنا وعصيانه
وقربي من ربنا وادعيه وهوا هيخفف عنك باذن الله

marobader كتب:

سارة حبيبتي انتي حوارك ده بايظ و كان لازم ينتهي انا مش فاهمه ازاي اهلك يسبوكي تروحي نعيشي في المغرب لوحدك ده المفروض كان دفنوكي و لا انك تروحي تعيشي في الزقازيق لوحدك حب اية يا ماما الي بنت بتسيب بلدها عشانه و بعدين في حد يروح يشتغل في المغرب برضوا حرام عليكي يا شيخة سيبي الوظايف لصحاب البلد هيا المغرب نقصاكي عملاله بالظبط زي اللبنانين الي بييخوا يشتغلوا في مصر ما الخليخ قدمكوا تيجوا تقطعوا علينا لية
و بعدين انتي قولتي انك هناك من 5 سنين يعني من ونتي عيلة بالزمة ده شغل ناس عاقلين و كنتي قاليلة فرحك مش دلوقتي خالص لسه كام سنة مش عارفة غيرتي رائيك امتي بس؟
و اصلا اي حب يبتي قبل سن الرشد من حق اي طرف فيه ينهيه في اي وقت لانعه بيقا لعب عيال واي هبل
انا شفت واحدة مرة اتعلقت بواحد مسيحي واحنا في اولي ثانوي طبعا اي هبل واحدة و احنا في اعدادي صيدلة اتخطبت لواحد داخل حقوق بعد الدبلوم
اللوم مش عليه انتي دخلتي طريق كله حفر من الاول

يا بنتي راجعي كلامها كويس هي هناك ومعاها اهلها مامتها واختها

سارة حبيبتى

اوعى تزعلى من الى حصل بالعكس لازم تجمدى عشان تعرفى تعيشى ايامك الجايه وصدقنى انتى مقصرتيش فى حاجة ولا غلطتى فى اى حاجة غير ان اختيارك للشخص ده كان غلط وعشان انتى عارفه ربنا كويس وربنا بيحبك اكتشفتى كل حاجة وحكلك الموقف دة قريب كدة

صدقنى مش كل حاجة احنا بنعوزها بنخدها واكيد كان ليكى زكريات حلوة حاولى تتناسيها واشغلى وقت باى شىء تانى مفيد اخرجى مع اصحابك اهتمى بشغلك اكتر حاولى تنسى واعرفى ان ربنا مقدرلك الخير مع حد احسن بكتير واحمدى ربنا على كل الى حصل واوعى تندمى على اى شيىء فاتك
افرحى من قلبك مع اصحابك غيرى مودك فى اى حته واوعى تضعفى واحنا كلنا معاكى وجمبك

marobader كتب:

سارة حبيبتي انتي حوارك ده بايظ و كان لازم ينتهي انا مش فاهمه ازاي اهلك يسبوكي تروحي نعيشي في المغرب لوحدك ده المفروض كان دفنوكي و لا انك تروحي تعيشي في الزقازيق لوحدك حب اية يا ماما الي بنت بتسيب بلدها عشانه و بعدين في حد يروح يشتغل في المغرب برضوا حرام عليكي يا شيخة سيبي الوظايف لصحاب البلد هيا المغرب نقصاكي عملاله بالظبط زي اللبنانين الي بييخوا يشتغلوا في مصر ما الخليخ قدمكوا تيجوا تقطعوا علينا لية
و بعدين انتي قولتي انك هناك من 5 سنين يعني من ونتي عيلة بالزمة ده شغل ناس عاقلين و كنتي قاليلة فرحك مش دلوقتي خالص لسه كام سنة مش عارفة غيرتي رائيك امتي بس؟
و اصلا اي حب يبتي قبل سن الرشد من حق اي طرف فيه ينهيه في اي وقت لانعه بيقا لعب عيال واي هبل
انا شفت واحدة مرة اتعلقت بواحد مسيحي واحنا في اولي ثانوي طبعا اي هبل واحدة و احنا في اعدادي صيدلة اتخطبت لواحد داخل حقوق بعد الدبلوم
اللوم مش عليه انتي دخلتي طريق كله حفر من الاول

الأخت العزيزة أولاً كما علقت الأخت رورا إنك لو راجعتي الكلام جيداً ستجدين أن والدتها و أختها كانوا معها و بالتالي نفهم من الكلام أن العيلة كلها هناك
ثانياً إنتي فكرتيني بموقف حصلي من سنين .. الحمد لله منذ أن لبست الحجاب و أنا ملتزمة به جداً الأول كنت بملابس عادية و لكن طويلة واسعة و الأن أرتدي عبايات واسعة و أرجو أن يدعو لي الجميع بالنقاب بإذن الله ... المهم قبل إرتدائي العبايات ذهبت يوم لجامع النور بالعباسية و أنا أحب الصلاة فيه جداً و كان قريب من الجامعة لإني من جامعة عين شمس و كنت أصلي فيه و بعد أن أنتهيت و انا نازلة منة سألت أحد الأخوات هل شعري يظهر من الحجاب بالرغم من إني ألتزم جدااااااااً بعدم ظهور و لا شعره منذ حجابي و إذ بها تقول لي إلبسي طاقية تحت الحجاب عشان شعرك ميبانش و كنا في عز الحر و الجو ناااااار فقولتلها ببراءة الجو حر أوي فردت "جهنم حرها أكتر" أقسم بالله العلي العظيم لولا رحمة ربي بي كدت أخلع الحجاب و أنا أقف أمامها من وقع الكلمة
أختي الغالية المصاب بالرصاص إما أن نزيلها منه بعملية جراحية أو إذا لم يكن الوقت مناسب فكما تشاهدي بالأفلام بسكين حامية فهل تعتقدين إنك إذا كان أمامك رجل بالثمانين عنده ضغط و سكر و أمراض قلب و به رصاصة سيتحمل خروج الرصاصة منه بالسكين المحمي صدقيني و لا حتى شاب به مرض قلب أو سكر في هذه الحالة سيكون هذا قتل وليس مساعدة ... أختي حتى النصيحة تكون بشروط و يجب أن تراعي حالة من تتحدثي معهلأن النصيحة حتى لو كانت عن خوف على الشخص إذا كانت لا تراعي حالته و تضغط عليه في وقت لا يحتمل الضغط قد تكون أثارها عكسية أو سيئة جدااااااااً
أعلم إنك تريدين الخير و لكن لا أعتقد أن حالتها تسمح بذلك و يجب علينا كإخوة و أخوات لها أن نساعدها في تخطي صدمتها أولاً ثم إذا كان هناك أي خطأ تنبيها بعد أن نطمئن عليها
لا أريد أنا أيضاً أن أكون قاسية عليكي لإني أشعر إن كلامك من خوف عليها و لكن أشعر أيضاً إن الوقت غير مناسب لأي من هذا

ربنا ينور لك بصيرتك يا بيور ويحقق كل اللي تتمنيه ويزيد ايمانك يا رب والمهم هو القلب وطالما قلبك عامر بالأيمان ربنا حيزيدك ان شاء الله

dinaali كتب:

ربنا ينور لك بصيرتك يا بيور ويحقق كل اللي تتمنيه ويزيد ايمانك يا رب والمهم هو القلب وطالما قلبك عامر بالأيمان ربنا حيزيدك ان شاء الله

آميـــــــــــــــــــــــــــــــــن .. والله يا دينا متعرفيش أنا محتاجة الدعاء قد إية اليومين دول و بجد دعائك شرح صدري و أسعدني كثيــــــــــــــررررراااااااااً .... ربنا يجازيكي كل خير و يسعدك و يكتب لنا الخير كلنا و يرضينا باللي يكتبه و يرضى عننا و يكتبنا من الفائزين بالسعادة في الدنيا و الأخرة
ربنا يبارك فيكي و معلش أتلخبطت بينك و بين رورا

ربنا يجازيكي الخير يا بيور انا مش هرد عليها ابدا كفاية اسلوبها ذكرتني بالفيديوهات الدعوية للي لما بتدخليها بتسمعي صراخ و بكاء و من كثر الهول تطلعي منها يعني حتى لو كانت عايزة تنصحني تنصحني بطريقة اخلاقية و انا الحمد لله عارفة نفسي و اخلاقي و الشغل في المغرب زيه زي اي دولة ثانية يا ريت نصحح شوية معلوماتنا بقا مش كل للي بيروح للمغرب بيشتغل شغلانة وحشة و انا كنت ساكنة بعيد وهو بعيد و بنشوف بعضنا باحترام