مكرونه ودع اهلك.

مكرونة ودع أهلك
النهاردة هقولكم على وصفة مكرونه اخترعتها وتستاهل تودع اهلك بعدها لانك هتأنخ بعدها فوراً

الوصفه دى مناسبة لحوالى كيسين مكرونه (800 جرام ) يا حبذا لوتكون اسباجيتى او بينا ( قلم يعنى ) ويا سيدى بأه لو فيتوتشينى بالإيطالى ( شرايط يعنى بالعربى )

خدى عندك
* بصلة مبشورة

* 5 فصوص توم

* 1/2 جوزة طيب ( لما دارالافتاء تبقى تبت فى حرمانيتها )

* ملعقة صغيرة ممسوحه جنزبيل او زنجبيل مش مشكله

* ملعقة صغيره غير ممسوحه قرفه

* ملعقة صغيره غير ممسوحه كارى

* ملح وفلفل تدعكى بيه البصل المبشور عشان ما يعملش ريحة

* 2 كوب لبن زبادى او 3 او 4 اللى يطلع من ذمتك او رايب جاهز مش بتاع البيت لأن الجاهز بيبقى مجنس ( ما فيهوش كلاكيع يعنى )

* لحم مفروم مستوى من غير بصل لان البصل بيغير طعم اللحم فى الأكله دى مجمد بلدى مش فارقه او هوت دوج مستوى

علبه جبنه ألترا كريم ميلكانا او كوبايه جبنه بريزيدنت ما تستخريش وحطى العلبة كلها
عصير طماطم
2 مكعب مرقة دجاج ( يمكن الاستغناء عنه )
زيتون اسود او مشروم (يمكن الاستغناء عنه حسب الرغبه )

الطريقة
1- بصى يا ستى هتمزجى البهارات مع البصل والثوم والزبادى او اللبن الرايب وتشوحييهم مع زبدة او زيت لما قوامهم يغلظ شوية وتحسى انهم امتزجوا

2- ضيفى عصير الطما طم لغاية لما تسبك وبعدها اللحم المفروم مستوى طبعاً وفى الآخر الجبنه

3- ضيفى المكرونه على المزيج الشهى دة وقلبيها ويمكن اضافة الجبن المبشور للتقديم

عند التقديم يمكن اضافة بعض اللبن القليل لجعلها مرِقه ( بكسر الراء ) اى سائله بعض الشئ وده مش عك مجرباها كده والله

وبالهنا والشفا تاكليها من هنا وتتقلبى كما الفسيخة من هنا

منقووووول




وأحــــــلام سعـــــــيدة

هههههههه حلو اويي الكومنتس ديه يا جميل !!!!!!

ميرسى يا بيبى

اية الجمال دة وتفتكرى لما اكلها وانام ححلم باية
على العموم حجربها علشان نفسى بنتى تاكلها علشان تنام وارتاح منها شوية

اوكي يا ابتسام ويارب تنام عشان تريحك شويه واكيد لما تاكليها وتنامى هتحلمى باكل برضوا هههههههههههه اديها مترحمهاش ياله حبى ربنا يخليى بنتك

وااااااو ودع اهلك بجد اوعدك هجربها بس يا رب ماتعملش حموضه بس اكيد هتعجب بناتى لانهم بيحبو المكرونه موت تسلم ايديكى يا شيمو يا عسل

ميرسى لاهتمامك يا لميا ويارب ياكلوها وتعجبهم بالف هناء وشفاء

ميرسى يالولو ياجميله لتفاعلك معى